„ჩვენ ვითხოვთ სპორტული მოედანი დაგვიტოვონ,“ – ამბობს თამარის დასახლებაში, დევნილების კორპუსების მახლობლად მცხოვრები დავით ბერიძე. აქ მცხოვრებმა მოქალაქეებმა დღეს, 23 თებერვალს, მოედანზე შესვლის საშუალება არ მისცეს მიწის მესაკუთრე კომპანიის ტრაქტორს. ადგილზე იყო პოლიციაც.
„წინასაარჩევნოდ გვითხრეს, რომ მიწას გაყიდდნენ იმ პირობით, რომ მოედანი მოედნად დაგვრჩებოდა და პირიქით, კეთილმოაწყობდნენ. ახლა კი, ტექნიკა პირდაპირ მოედნის ადგილზე იწყებს მუშაობას“, – ამბობს დავით ბერიძე.
თამარის დასახლებაში, ყოფილი „ბითმაჟის“ ტერიტორია კერძო კომპანია „ნაზილბეს“ საკუთრებაშია. ამ კომპანიაში კომენტარი არ გააკეთეს.
„ეს არის კერძო საკუთრებაში არსებული ტერიტორია. იმ შემთხვევაში, თუ კომპანია გამოიჩენს კეთილ ნებას, მერია აუცილებლად განიხილავს აღნიშნულ პროექტს“, – მოგვწერეს ბათუმის მერიის მუნიციპალური სერვისების სააგენტოს პრესცენტრიდან.
ბათუმში, ტბეთის ქუჩაზე, N 52-ში, 42 073 კვადრატული მეტრი მიწის ნაკვეთი, რომელზეც სტადიონიც მდებარეობს, სახელმწიფო ქონების ეროვნულმა სააგენტომ აუქციონზე 1 861 500 ლარად, უპირობოდ გაყიდა. ტერიტორიის მესაკუთრეა შპს „ნაზილბე++“.
„ჩვენი უფროსი თაობა მუშაობდა ბითმაჟის ქარხანაში, დაგვპირდნენ, რომ მოგვცემდნენ ბინებსაც, მაგრამ შემდეგ პირობა არ შეასრულეს,“ – აღნიშნა დავით ბერიძემ „ბათუმელებთან“. ათეულობით ოჯახი ამ ტერიტორიაზე თვითნებურად დაკავებულ ფართობებში ცხოვრობს.
