მთავარი,სიახლეები

ქუთაისში საცხოვრებელი სახლების ფასადების რეაბილიტაცია იწყება

31.01.2023 • 1078
ქუთაისში საცხოვრებელი სახლების ფასადების რეაბილიტაცია იწყება

ქუთაისში საცხოვრებელი ბინების ფასადების რეაბილიტაციის პროგრამა იწყება. სამუშაოების 95 პროცენტს ცენტრალური ბიუჯეტი დააფინანსებს, 5 პროცენტს კი – ადგილობრივი ბიუჯეტი.

ფასადების რეაბილიტაციაზე ქუთაისის მერიამ რამდენიმე ტენდერი უკვე გამოაცხადა.

  • დაგეგმილია რუსთაველის გამზირზე №110; 112; 114-ში მდებარე კორპუსების ფასადის შეცვლა.

პროექტის თანახმად, სამივე კორპუსის ფასადზე აკრული ბუნებრივი ქვა უნდა მოიხსნას, კედლები გაილესოს და საფასადე საღებავით შეიღებოს. ასევე, უნდა ჩამოხსნან ფასადზე არსებული ყველა კონდიციონერი. აივნებიც უნდა შეიცვალოს და ლითონის ჭედური მოაჯირები მოეწყოს.

რუსთაველის ქუჩაზე მდებარე ამ სამი საცხოვრებელი ბინის ფასადების რეაბილიტაციისათვის ერთი ტენდერია გამოცხადებული, ჯამურად 409 075 ლარზე.

სატენდერო წინადადების თანახმად, №110 საცხოვრებელი ბინის ფასადის რეაბილიტაციის თანხა არ უნდა აღემატებოდეს 137 016 ლარს, №112 საცხოვრებელი ბინის – 113 696 ლარს და №114 საცხოვრებელი ბინის – 158 363 ლარს.

რუსთაველის 112

  • 206 986 ლარზეა გამოცხადებული ტენდერი დუმბაძის ქუჩის №2 საცხოვრებელი ბინის ფასადის რეაბილიტაციისათვის.

პროექტის თანახმად, შენობის აივნებზე არსებული მოაჯირები უნდა მოიხსნას და მის ნაცვლად ჭედური ლითონის მოაჯირი მოეწყოს, ხოლო შენობის ფასადი მაღალი ხარისხის საფასადე საღებავით შეიღებოს.

ტენდერში წინადადებების მიღება 3 თებერვალს დაიწყება და 6 თებერვალს დასრულდება.

ასე გამოიყურება დუმბაძის ქუჩის №2-ში საცხოვრებელი ბინის ფასადი

  • 410 845 ლარზეა გამოცხადებული ტენდერი შოთა რუსთაველის გამზირის №102-104 -ში მდებარე საცხოვრებელი ბინის ფასადის რეაბილიტაციისათვის.

პროექტის თანახმად, ამ თანხით კორპუსის აივნებზე უნდა მოეწყოს კერამოგრანიტის ფილები, ამორტიზებული კარ-ფანჯრები უნდა შეიცვალოს ახლით. ფასადზე განთავსდეს გარეგანათება და შეიღებოს.

ასე გამოიყურება რუსთაველის 102-ში მდებარე კორპუსი

  • კიდევ ერთი კორპუსი, რომლის რეაბილიტაციაც იგეგმება, ქუთაისში, ასათიანის ქუჩის №139-ში მდებარე საცხოვრებელი ბინაა. ამ ბინის ფასადის რეაბილიტაციაზე მერიას ტენდერი 183 326 ლარით აქვს გამოცხადებული.

გამარჯვებულმა კომპანიამ ტენდერის მოგებიდან ორ თვეში უნდა ჩაუტაროს კორპუსის ფასადს რეაბილიტაცია. კერძოდ, შეღებოს ფასადი მაღალი ხარისხის საფასადე საღებავით, აივნებზე მოხსნას არსებული თუნუქი და შეცვალოს ის ალუკაბონდის პანელური მოაჯირით.

ტენდერში წინადადებების მიღება 4 თებერვალს დაიწყება და 7 თებერვალს დასრულდება.

ასე გამოიყურება ასათიანის ქუჩის №139-ში მდებარე საცხოვრებელი ბინის ფასადი

 

გადაბეჭდვის წესი


ასევე: