უკრაინული მედიის ინფორმაციით, უკრაინელი სამხედროები დიდ ბრიტანეთში ამჯერად იმისთვის ჩავიდნენ, რომ Challenger 2-ის ტანკების მართვა ისწავლონ. სწორედ წელს, იანვარში, გადაწყვიტა ბრიტანეთის მთავრობამ უკრაინას Challenger 2-ის ტანკები გადასცეს.
დღეს, 29 იანვარს, ბრიტანეთის თავდაცვის სამინისტრომ განაცხადა, რომ უკრაინელი ტანკისტები უკვე დიდ ბრიტანეთში იმყოფებიან და რუსეთის წინააღმდეგ ბრძოლის გასაგრძელებლად მომზადებას იწყებენ.
„დიდი ბრიტანეთი, პარტნიორ ქვეყნებთან ერთად, უკრაინას გადასცემს Challenger 2-ის ტანკებს, საერთაშორისო დონეზე უკრაინის მხარდაჭერის სადემონსტრაციოდ“, – ხაზგასმით აღნიშნავს ქვეყნის თავდაცვის დეპარტამენტი.
თავდაცვის სამინისტროს პრესსამსახურმა რამდენიმე ფოტო გამოაქვეყნა მას შემდეგ, რაც დიდ ბრიტანეთში დაფრინდა თვითმფრინავი, რომელშიც უკრაინელი ჯარისკაცები ისხდნენ.
___
უკრაინაში რუსეთის შეჭრის შემდეგ, დიდი ბრიტანეთის ყოფილმა პრემიერ-მინისტრმა, ბორის ჯონსონმა უარი უთხრა უკრაინას Challenger 2-ის ტანკების მიწოდებაზე. მაშინ ბრიტანეთმა განაცხადა, რომ ეს იდეა „არ იმუშავებს“.
2022 წლის აპრილში ბორის ჯონსონმა და ოლაფ შოლცმა ისევ განაცხადეს, რომ მათი ქვეყნები უკრაინისთვის ტანკების გადაცემისგან თავს შეიკავებენ. ჯონსონი მაშინ შეუთანხმდა პოლონეთს, რომ უკრაინას მიაწვდიდა მოძველებულ T 72-ებს.
ამ წლის იანვარს კი დიდი ბრიტანეთის მთავრობამ შეცვალა თავის გადაწყვეტილება და დაადასტურა, რომ უკრაინას გადასცემს Challenger 2-ის ტანკებს. საუბარია 14 ტანკზე.
უკრაინის თავდაცვის მინისტრ, ოლექსი რეზნიკოვს იმედი აქვს, რომ დასავლეთიდან მიღებული ტანკები ბრძოლებში მარტიდან ჩაერთვებიან.
__
ფოტო: დიდი ბრიტანეთის თავდაცვის სამინისტრო
