ნეტგაზეთი • RU

ლუკაშენკოს თქმით, კიევი ბელორუსს თავდაუსხმელობის პაქტს სთავაზობს – უკრაინა უარყოფს

ბელორუსის პრეზიდენტმა შეხვედრაზე ისაუბრა ქვეყანაში არსებულ პოლიტიკურ ვითარებაზე – და ამავდროულად განაცხადა, რომ უკრაინაში დასავლეთის „წაქეზებით“ აგრძელებენ ბოევიკებისა და ექსტრემისტების მომზადებას.

მან დასძინა, რომ კიევმა, მინსკს თითქოს შესთავაზა თავდაუსხმელობის პაქტის დადება. ალექსანდრე ლუკაშენკოს არ დაუკონკრეტებია, კონკრეტულად ვისი წინადადება იყო ეს.

„მე არ ვიცი, რატომ აკეთებენ ამას უკრაინელები. ერთის მხრივ, ისინი გვთხოვენ არავითარ შემთხვევაში არ ვიბრძოლოთ უკრაინასთან, რომ ჩვენი ჯარები იქ არ გადავიდნენ. ისინი გვთავაზობენ თავდაუსხმელობის პაქტის გაფორმებას, მეორეს მხრივ კი ფეთქებად ნარევს ამზადებენ და მათ შეიარაღებას გეგმავენ“, – ლუკაშენკოს სიტყვებს საინფორმაციო სააგენტო ბელტა [Белта] ციტირებს.

ლუკაშენკომ აღნიშნა, რომ „რეაქცია, ამ ექსტრემისტების მიმართ მკაცრი იქნება“.

ლუკაშენკოს განცხადების შემდეგ კომენტარი უმაღლესი რადას საგარეო პოლიტიკის კომიტეტის თავმჯდომარემ გააკეთა:

“არ მჯერა, რომ ასეთი წინადადება შეიძლება არსებობდეს. თუნდაც წმინდა ფორმალური თვალსაზრისით, ნებისმიერი საერთაშორისო შეთანხმების დადება ხანგრძლივი, ფორმალიზებული და საჯარო პროცესია. უფრო მეტიც, ასეთი შეთანხმება ხშირად მოითხოვს რატიფიცირებას პარლამენტის მიერ”, – ამბობს ალექსანდრე მერეჟკო.

ბელორუსმა საკუთარი ტერიტორია ომის დაწყებისას რუსეთს პლაცდარმად გამოაყენებინა. რუსეთის ჯარების ნაწილი უკრაინის ტერიტორიაზე სწორედ ბელორუსიდან შეიჭრა, თუმცა ამაში ბელორუსი ჯარისკაცები არ მონაწილეობდნენ.

ნეტგაზეთის მასალების სხვა გამოცემებში გადაბეჭდვის წესი
ავტორი
თამარ ნერგაძე არის "ბათუმელების" რეპორტიორი 2017 წლის ოქტომბრიდან. ტელ.: 568 81 41 75 / E-mail.: tamarnergadze123@gmail.com