უკრაინის პრეზიდენტმა, ვოლოდიმირ ზელენსკიმ თავის ყოველდღიურ მიმართვაში დღევანდელ სარაკეტო თავდასხმაზე ისაუბრა. ზელენსკიმ თქვა, რომ შესაძლებელია „რაშისტების ტერორისტული თავდასხმების შეჩერება“, ოღონდ ამისთვის მათ პარტნიორებმა უნდა მიაწოდონ შესაბამისი იარაღი.
„შესაძლებელია თუ არა რუსული ტერორის შეჩერება? დიახ. შესაძლებელია ამის მიღწევა სხვაგან, გარდა უკრაინის ბრძოლის ველისა? სამწუხაროდ, არა. ეს შესაძლებელია და უნდა გაკეთდეს ჩვენს მიწაზე, ჩვენს ცაზე, ჩვენს ზღვაში.
რა არის ამისთვის საჭირო? ის იარაღი, რომელიც ჩვენ პარტნიორებს აქვთ საწყობებში და რომელსაც ასე ელიან ჩვენი ჯარისკაცები. მთელმა მსოფლიომ იცის, როგორ შეიძლება შეაჩერო ის, ვინც სიკვდილს თესავს. მე მადლობელი ვარ ყველასი, ვინც ამაში გვეხმარება!“ – განაცხადა ღამის მიმართვაში ზელენსკიმ.
უკრაინის პრეზიდენტის თქმით, დღეს რუსებმა უკრაინაში 30 რაკეტა გაუშვეს, უკრაინის საჰაერო-თავდაცვის ძალებმა კი 20 რაკეტის ჩამოგდება შეძლო.
დღეს, 14 იანვარს, უკრაინის მთელ ტერიტორიაზე გამოცხადებული იყო განგაში, რადგან რუსეთმა მორიგი მასშტაბური სარაკეტო იერიში მიიტანა ქვეყნის კრიტიკულ ინფრასტრუქტურაზე. ერთი რაკეტა დაეცა საცხოვრებელ კორპუსს დნიპროში, რის შედეგადაც მინიმუმ 5 ადამიანი დაიღუპა, 60 კი დაშავდა, მათ შორის ბავშვებიც.
უკრაინული მედიის ინფორმაციით, სამაშველო ჯგუფები ჯერ კიდევ ცდილობენ კორპუსის ნანგრევებიდან ადამიანების ამოყვანა.
