მედია უკრაინისთვის ახალი იარაღის გადაცემაზე იუწყება. კერძოდ, საუბარია DPICM ტიპის კასეტურ ბომბებსა და „ბრედლის“ ტიპის საბრძოლო მანქანებზე.
საბრძოლო მანქანა „ბრედლი“
აშშ-ის თავდაცვის დეპარტამენტის (პენტაგონი) განცხადებით, უკრაინა „ბრედლის“ ტიპის ქვეით საბრძოლო მანქანებს რამდენიმე კვირის შემდეგ მიიღებს.
„განვაგრძობთ მუშაობას რამდენადაც შეგვიძლია სწრაფად. არ ვაპირებთ წინასწარ განვაცხადოთ, როდის გადაეცემა ეს სისტემები უკრაინას. დარწმუნებული ვარ, უკრაინელები მათ მიღებისთანავე გამოაჩენენ“, – აღნიშნა პენტაგონის პრეს-სპიკერმა, პეტ რაიდერმა და დაამატა, რომ აშშ უკრაინას არა მარტო თავდაცვაში, არამედ ტერიტორიების გათავისუფლებაშიც დაეხმარება.
მისივე თქმით, უკრაინელ სამხედროებს მანქანის მართვას გერმანიაში ასწავლიან.
„ბრედლის“ ტიპის მანქანები 6 იანვარს გამოცხადებული სამხედრო დახმარების ნაწილია. მანქანას სახელი გენერალ ომარ ბრედლის პატივსაცემად ეწოდა და შეიქმნა 1970-იან წლებში. ამ საბრძოლო მანქანას აშშ-ის ჯარი ერაყსა და ავღანეთში იყენებდა.
კასეტური ბომბები
ჟურნალ „ფორინ პოლისის“ წყაროების ცნობით, 2022 წლის ბოლოს თურქეთმა უკრაინაში „ცივი ომის“ დროინდელი კასეტური იარაღის, DPICM-ის გაგზავნა დაიწყო.
საუბარია ე.წ. ორმაგი დანიშნულების კონვენციურ იარაღზე. ყოველი გასროლისას, თითო ჭურვი 88 უფრო პატარა ჭურვად იშლება.
„ეს აჩვენებს, რომ მიუხედავად იმისა, რომ თურქეთი ზოგიერთი თვალსაზრისით რუსეთს უახლოვდება, იგი ხდება უკრაინის მართლაც რომ მნიშვნელოვანი მხარდამჭერი სამხედრო თვალსაზრისით“, – ამბობს გამოცემის წყარო.
კიევი და ანკარა ინფორმაციაზე კომენტარს არ აკეთებენ.
DPICM „დაახლოებით ხუთ-ათჯერ უფრო მომაკვდინებელია, ვიდრე სტანდარტული ჭურვები“.
