ნეტგაზეთი • RU

სტამბოლში აშენდა პირველი მართლმადიდებლური ეკლესია თურქეთის რესპუბლიკის ისტორიაში

თურქეთში, ქალაქ სტამბოლში გაზაფხულზე გაიხსნება მართლმადიდებლური ეკლესია, რომელიც, თურქული მედიის ცნობით, პირველი ახალაშენებული მართლმადიდებლური ეკლესიაა თურქეთის რესპუბლიკის ისტორიაში.

ეკლესიის მშენებლობა 2019 წელს დაიწყო სტამბოლის ევროპულ ნაწილში ასირიელი მართლმადიდებელი ქრისტიანების მოთხოვნით.

სტამბოლში არსებული ასირიული ფონდის, „კადიმის“ პრეზიდენტმა, საიტ სუსინმა სააგენტო „ანადოლუსთან“ განაცხადა, რომ ეკლესია გაიხსნება უახლოეს ორ თვეში და მისი აგება დაახლოებით 4 მლნ დოლარი დაჯდა.

მან აღნიშნა, რომ ეს არის პირველი ეკლესია, რომელიც აშენდა თურქეთის რესპუბლიკის ისტორიაში ოფიციალური ნებართვით – აქამდე იყო არსებული ეკლესიების შეკეთების ან რესტავრირების პრაქტიკა.

საიტ სუსინის თქმით, 1844 წელს აგებული ეკლესია სტამბოლში, ბეიოღლუს რაიონში ვერ აკმაყოფილებდა მორწმუნეების მოთხოვნას, ამიტომაც საჭირო გახდა ახალი ეკლესიის მშენებლობა. ეკლესია აიგო საზოგადოების შემოწირულებებით.

_____________

ფოტო: „ანადოლუ“

მასალების სხვა გამოცემებში გადაბეჭდვის წესი
ნანა კვაჭაძე, ჟურნალისტი ელფოსტა: kvachadze.n@gmail.com