ვაშინგტონში ვიზიტის დროს უკრაინის პრეზიდენტმა, ვოლოდიმირ ზელენსკიმ, კიევისთვის ATACMS-ის ტიპის რაკეტების გადაცემა ითხოვა, თუმცა ამერიკულმა მხარემ ამაზე კვლავ უარი განაცხადა – იუწყება „პოლიტიკო“.
გამოცემის წყაროს ცნობით, ვაშინგტონის პოზიცია ამ საკითხზე უცვლელია.
„უნიანის“ ცნობით, ახალი, შორი დისტანციის რაკეტები უკრაინისთვის მნიშვნელოვანია, ვინაიდან რუსულმა მხარემ მოახერხა „ჰაიმარსთან“ ადაპტირება და კრიტიკული ობიექტები არსებული რაკეტების მოქმედების ზონის იქით განათავსა.
„ჰაიმარსი გარდამტეხი მომენტი იყო იქამდე, სანამ რუსეთმა მასთან ადაპტირება მოახერხა. ახლა, შეიძლება ითქვას, მივაღწიეთ მაქსიმუმს, რაც ამ იარაღით შეგვეძლო. შემდეგი ეტაპისთვის უფრო შორი დისტანციის იარაღი გვჭირდება, რათა მივაღწიოთ ოთხი თვის წინ მიღებულ შედეგებს, როცა ჰაიმარსი პირველად მივიღეთ. ახლაც შეგვიძლია იგივე, მაგრამ დისტანცია უფრო დიდი უნდა იყოს“, – განაცხადა უკრაინის ეროვნული უსაფრთხოებისა და თავდაცვის საბჭოს მდივანმა, ოლექსი დანილიუკმა.
უკრაინისთვის ATACMS-ის ტიპის რაკეტების გადაცემის საჭიროებაზე ისაუბრა აშშ-ის ჯარების ყოფილმა მთავარსარდალმა ევროპაში, ბენ ჰოჯესმაც. მისი თქმით, უკრაინის შეიარაღებულ ძალებს „ზუსტად ეს სჭირდებათ“ – იარაღი, რომელიც მათ საშუალებას მისცემს, დარტყმები მიიტანონ რუსეთის უმთავრეს პოზიციებზე, მაგალითად, ყირიმის ხიდზე, ნახევარკუნძულზე მდებარე ავიაბაზებსა და მომარაგების ხაზებზე.
ATACMS-ი არის შორ დისტანციაზე მოქმედი რაკეტები, რომლებსაც „ჰაიმარსი“ და M270 MLRS სისტემები ისვრის 310 კილომეტრ მანძილზე.
ჯერ კიდევ აგვისტოში პრეზიდენტ ბაიდენის მრჩეველმა ეროვნული უსაფრთხოების საკითხებში, ჯეიკ სალივანმა განაცხადა, რომ აშშ უკრაინას არ მიაწვდიდა ATACMS რაკეტებს, რადგან მათი სროლა შესაძლებელი იქნება რუსეთის ტერიტორიაზე, რამაც შესაძლოა ომის დამატებითი ესკალაცია გამოიწვიოს.
