უკრაინის გენერალური პროკურატურის ცნობით, ქვეყნის უსაფრთხოების სამსახურმა დაამთავრა გამოძიება და ბრალდება წარუდგინა რუსეთის მოქალაქე ოლგა ბიკოვსკაიას, რომელიც მეუღლეს, რუს ჯარისკაცს, უკრაინელი ქალების გაუპატიურებისკენ მოუწოდებდა.
„რადიო თავისუფლების“ უკრაინული ბიუროს ცნობით, ბიკოვსკაიას უკვე შეატყობინეს ბრალდების შესახებ და საერთაშორისო ძებნა გამოაცხადეს.
მედიის ცნობით, ჯერ არ არის დადგენილი, ცოცხალია თუ არა ოლგა ბიკოვსკაიას ქმარი.
უკრაინელი სამართალდამცავების ვერსიით, ბიკოვსკაია ქმარს დანაშაულის ჩადენისკენ „უკრაინული საზოგადოებისა და ქალების მიმართ პირადი აუტანლობის ნიადაგზე მოუწოდებდა“.
გამოძიების ცნობით, მისი ქმედებები არღვევს ჟენევის კონვენციის 27-ე მუხლის მეორე ნაწილს, ომის დროს სამოქალაქო პირების დაცვის შესახებ.
გარდა ამისა, გამოძიება მიმდინარეობს უკრაინის სისხლის სამართლის კოდექსის 438-ე მუხლის პირველი ნაწილით – ომის კანონების დარღვევა. დამნაშავედ ცნობის შემთხვევაში, ბიკოვსკაიას, რომელსაც დაუსწრებლად მიუსაჯეს წინასწარი პატიმრობა, 12 წლამდე პატიმრობა ემუქრება.
ჩანაწერი, რომელშიც ქალი მეუღლეს უკრაინელი ქალების გაუპატიურებისკენ მოუწოდებდა, ჯერ კიდევ თებერვალში გავრცელდა. „უნიანის“ ცნობით, მისი მონაწილე პირები უკრაინელმა ჟურნალისტებმა ამოიცნეს.
- რომან ბიკოვსკი [27 წლის]: ჟურნალისტების ცნობით, მონაწილეობდა ყირიმის ანექსიის ოპერაციაში, ასევე მსახურობდა რუსეთის ეროვნულ გვარდიაში („როსგვარდია“);
- ოლგა ბიკოვსკაია [ჯარისკაცის მეუღლე], ჟურნალისტების ინფორმაციით, ოკუპირებულ ყირიმში შვილთან ერთად ცხოვრობს.
წყვილის სატელეფონო ჩანაწერში ოლგა ბიკოვსკაია მეუღლეს ეუბნება, რომ „უკრაინელი ქალები გააუპატიუროს და მას არაფერი უთხრას“. ქმრის კითხვაზე, აძლევს თუ არა ასე მოქცევის ნებართვას, ბიკოვსკაია დადებითად პასუხობს და [გაუპატიურების დროს] „თავდაცვის“ რეკომენდაციას აძლევს.
