მთავარი,სიახლეები

მოსკოვი ირანულ რაკეტებს უკრაინის ინფრასტრუქტურაზე თავდასხმისთვის გამოიყენებს – ბრიტანეთის დაზვერვა

10.12.2022 • 973
მოსკოვი ირანულ რაკეტებს უკრაინის ინფრასტრუქტურაზე თავდასხმისთვის გამოიყენებს – ბრიტანეთის დაზვერვა

დიდი ბრიტანეთის დაზვერვის შეფასებით, მოსკოვისა და თეირანის თანამშრომლობა თავდაცვით სფეროში სრულიად ახალ ეტაპზე გადადის.

უწყება ვარაუდობს, რომ ირანის დახმარება რუსეთისთვის მომავალ თვეებში, სავარაუდოდ, კიდევ უფრო გაიზრდება: მოსკოვი ცდილობს, მიიღოს მეტი შეიარაღება, მათ შორის ასობით ბალისტიკური რაკეტა.

„უკრაინაში შეჭრის შემდეგ ირანი რუსეთის ერთ-ერთი მთავარი სამხედრო მხარდამჭერი გახდა. დიდი ალბათობით, ამის სანაცვლოდ, რუსეთი ირანს უპრეცედენტო მასშტაბის სამხედრო და ტექნიკურ დახმარებას უწევს, რაც ამ ორი ქვეყნის თანამშრომლობას თავდაცვის სფეროში სრულიად ახალ ეტაპზე გადაიყვანს,“ – წერს დაზვერვა 10 დეკემბრის რელიზში.

უწყების შეფასებით, რუსეთმა SS-26 „ისკანდერების“ საკუთარი მარაგი მთლიანად ამოწურა. ეს არის ახლო მანძილზე მოქმედი ბალისტიკური რაკეტა, რომელსაც 500 კილოგრამიანი ქობინის 500 კილომეტრზე გადატანა შეუძლია.

„თუ რუსეთი შეძლებს დიდი რაოდენობით ირანული ბალისტიკური რაკეტებით შეიარაღების შევსებას, ამ რაკეტებს, სავარაუდოდ, გამოიყენებს უკრაინის კრიტიკული ინფრასტრუქტურის წინააღმდეგ დაწყებული კამპანიის გასაგრძელებლად და კიდევ უფრო გასაფართოებლად,“ – ასკვნის ბრიტანეთის დაზვერვა.

ირანიდან შეიარაღების მიღებაზე გაერთიანებული სამეფოს თავდაცვა გუშინდელ სადაზვერვო ცნობარშიც წერდა. უწყება აღნიშნავდა, რომ სავარაუდოდ, რუსეთმა ირანისგან ლეტალური უპილოტო საფრენი აპარატების ახალი პარტია მიიღო.

დაზვერვის ეს ვარაუდი დაფუძნებულია კიევის ოფიციალური პირების განცხადებებზე, რომ ბოლო სამი კვირის განმავლობაში, უკრაინაში პირველად გამოჩნდა ირანული წარმოების „შაჰედები“.

გადაბეჭდვის წესი


ასევე: