რუსეთის პრეზიდენტი ვლადიმერ პუტინი უკრაინაში სამხედრო კონფლიქტის გაჩაღებაში დასავლეთს ადანაშაულებს და აცხადებს, რომ დონბასში გენოციდი სწორედ დასავლეთმა წაახალისა, ახლა კი უკრაინას თვითმკვლელობისკენ უბიძგებს.
შანხაის თანამშრომლობის ორგანიზაციისა და დამოუკიდებელ სახელმწიფოთა თანამეგობრობის ქვეყნების ლიდერებისადმი ვიდეომიმართვაში პუტინი ეკონომიკური სანქციების გამოც გამოთქვამს უკმაყოფილებას.
მისი თქმით, დასავლეთი აწესებს „უკანონო ეკონომიკურ და სავაჭრო სანქციებს“, „აჩაღებს სამხედრო კონფლიქტებს მთელ მსოფლიოში“ და „ცდილობს მისთვის არასასურველი ხელისუფლებების დამხობას“.
„მათი მოქმედების მძიმე შედეგებს ვხედავთ ახლა უკრაინაში. წლების განმავლობაში დასავლეთი ურცხვად უწევდა ექსპლუატაციას მის რესურსებს. წაახალისა გენოციდი და ტერორი დონბასში. ფაქტობრივად, კოლონიად აქცია ეს ქვეყანა და ახლა ცინიკურად იყენებს უკრაინელ ხალხს, როგორც საზარბაზნე ხორცს და ტარანს რუსეთის წინააღმდეგ“, – აცხადებს პუტინი.
რუსეთის პრეზიდენტის თქმით, დასავლეთი, რომელიც განაგრძობს უკრაინისთვის შეიარაღებისა და საბრძოლო მასალების მიწოდებას და იქ „დაქირავებულ მებრძოლებს აგზავნის“, უკრაინას თვითმკვლელობისკენ უბიძგებს.
________________
გუშინ ევროკავშირმა რუსეთის ფედერაციას უკრაინაში შეჭრის გამო სანქციების მორიგი, მე-9 პაკეტი დაუწესა.
ევროკავშირი კრძალავს რუსეთისთვის დრონების/უპილოტო საფრენი აპარატების მიყიდვას; დრონების ექსპორტი იკრძალება ირანშიც, – რომელიც რუსეთს ამ იარაღით ამარაგებს, – და აკრძალვა ასევე ეხება „მესამე ქვეყნებს, რომლებმაც შესაძლოა დრონები რუსეთს მიაწოდონ“
ევროკომისიის პრეზიდენტის განცხადებით, პაკეტი ასევე მოიცავს „ექსპორტის კონტროლს, – განსაკუთრებით ორმაგი დანიშნულების საქონელს, რომელსაც შესაძლოა რუსეთის სამხედრო მანქანა იყენებდეს“.
