ნეტგაზეთი • RU

რატომ ალაპარაკდა ლუკაშენკო ბელარუსზე თავდასხმის საფრთხეზე – ISW-ის შეფასება

ბელარუსის პრეზიდენტი ალექსანდრ ლუკაშენკო NATO-სგან მომავალ საფრთხეზე განცხადებებით ცდილობს, ხაზი გაუსვას ბელარუსის ჯარის ქვეყანაში დატოვების საჭიროებას და უკრაინასთან ომში ჩაბმა აიცილოს თავიდან – მიიჩნევენ ომის კვლევის ამერიკული ინსტიტუტის (ISW) ანალიტიკოსები.

ლუკაშენკომ განაცხადა, რომ NATO ბელარუსზე თავდასხმისთვის ემზადება, რომ ალიანსი აძლიერებს საბრძოლო მზადყოფნას მეზობელ ქვეყნებში და ალიანსი და უკრაინა ბელარუსულ-უკრაინული საზღვრის სიახლოვეს პროვოკაციებში დაადანაშაულა. მისი თქმით, უკრაინა NATO-ს ომში ჩათრევას ცდილობს, თუმცა ბელარუსის ხელისუფლებამ მოახერხა და ჯერჯერობით შეაკავა პოტენციური მოწინააღმდეგე.

ლუკაშენკოს გამოსვლების პარალელურად, ქვეყნის თავდაცვის მინისტრმა, ვიქტორ ხრენინმაც განცხადა, რომ ბელარუსი უკრაინასთან ომში მონაწილეობისთვის არ ემზადება და საჭიროების შემთხვევაში, მხოლოდ თავს დაიცავს.

„სავარაუდოდ, ლუკაშენკო და ხრენინი ქმნიან ამ საინფორმაციო კამპანიას NATO-ს გამოგონილი აგრესიისა და ბელარუსის საზღვართან პროვოკაციების შესახებ, რათა გაიმყარონ საფუძველი ბელარუსის ჯარების ქვეყნის ტერიტორიაზე დასატოვებლად და წინააღმდეგობა გაუწიონ რუსეთის ზეწოლას,“ – წერენ ინსტიტუტის ანალიტიკოსები.

ISW ბელარუსის უკრაინასთან ომში ჩართვის შესაძლებლობას კვლავაც ნაკლებსავარაუდოდ მიიჩნევს.

ISW-ის ანგარიშის სხვა მთავარი მიგნებები:

  • რუსეთის ძალები განაგრძობდნენ თავდაცვით ოპერაციას სვატოვო-კრემინნას ხაზზე;
  • რუსეთის ძალებმა გარკვეულ წარმატებას მიაღწიეს ბახმუტის გარშემო და განაგრძობდნენ შეტევას ავდეევკა-დონეცკის რაიონში;
  • რუსეთი ძალები განაგრძობდნენ თავდაცვითი პოზიციების გამაგრებას და შემადგენლობის გადაადგილებას დნეპრის აღმოსავლეთ სანაპიროზე, ხერსონის ოლქში;
  • რუსეთის სამხედრო მანევრები ზაპოროჟიეს ოლქში შესაძლოა მიუთითებდეს, რომ უკრაინელთა დარტყმების პირობებში, რუსეთის არმიას ამ კრიტიკულად მნიშვნელოვანი ტერიტორიის შენარჩუნება აღარ შეუძლია;
  • რუსეთის არმია ყირიმში არსებულ რეზერვებს იყენებს ზაპოროჟიეში და დნეპრის აღმოსავლეთ სანაპიროზე თავდაცვითი ოპერაციების მხარდასაჭერად;
  • რუსეთის საოკუპაციო ძალები განაგრძობდნენ ოკუპირებული ტერიტორიების რუსეთის საფინანსო და სამართლებრივ სფეროებში ინტეგრირების მცდელობებს.
ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.