„ვაგნერის“ 20 წლის მებრძოლი, ანდრეი ასტრახანიდან უკრაინელ ჯარისკაცებს მას შემდეგ დანებდა, როცა „თავისიანებმა“ სანგრებიდან გამოაგდეს. ჯარისკაცის მონათხრობი დასტურდება ვიდეო მასალით, რომელსაც უკრაინული მედია ავრცელებს. თავად მებრძოლი ღიად საუბრობს იმაზე, თუ როგორ აღმოჩნდა უკრაინელთა ტყვეობაში.
დატყვევებულ ჯარისკაცთან საუბრის ვიდეო 54-ე მექანიზებულმა დანაყოფმა გაავრცელა. დაქირავებულმა „ვაგნერელმა“ უკრაინელ ჯარისკაცებს უთხრა, რომ ის მხოლოდ 1,5 დღე იბრძოდა.
„ვაგნერის“ მებრძოლის თქმით, უკრაინიდან „გაპარვა“ სურდა, მაგრამ მას დაასწრო „კოლეგამ“, რომელიც გაქცევის მცდელობის დროს „ანულირებულიქნა“. რუსი ჯარისკაცის განმარტებით, კერძო სამხედრო დაჯგუფება „ანულირება“ ნიშნავს დახვრეტას.
„სანგარში ვიყავი. ისინი („ვაგნერელები“ ) მეუბნებიან: „გადი. აქ ადგილი არ არის“. გავიქეცი სხვა სანგარში. იქვე უკვე თქვენი „ჩიტიც“ მოფრინდა. ასე დავრბივარ თხრილიდან თხრილში, ვიდრე ის დაფრინავს. როგორც კი მივხვდი, რომ დაგვცხებდა და ცუდად იყო საქმე, ეგრევე დავიწყე ფიქრი დანებებაზე, მაგრამ არ ვიცოდი, ეს როგორ გამეკეთებინა. ვიდექი და ვუყურებდი თქვენ დრონს, ორი ნაბიჯი გადავდგი წინ, დრონი გაფრინდა. არ ველოდი, რომ თხრილებიდან ასე გამომაგდებდნენ“, – ჰყვება „ვაგნერის“ მებრძოლი.
რუსი ჯარისკაცის თქმით, ის გადაიბირეს კოლონიაში, სადაც სასჯელს იხდიდა. „ვაგნერის“ რიგებში გაწევრიანებისთვის 300 ათას რუბლს დაჰპირდნენ, ხოლო სამხედრო ტექნიკის განადგურების შემთხვევაში – დამატებით თანხას. HIMARS-ის განადგურებისთვის კი სულაც მილიონებს დაჰპირდნენ.
ჯერ კიდევ აგვისტოში ცნობილი გახდა, რომ „ვაგნერის“ დამფუძნებელი ევგენი პრიგოჟინი პირადად იღებდა პატიმრების გადაბირებაში მონაწილეობას. ის დადიოდა კოლონიებში და მოუწოდებდა პატიმრებს, ებრძოლათ უკრაინის წინააღმდეგ. რუსეთის ფედერაციის წარუმატებლობისა და მუდმივი დანაკარგების ფონზე, აგრესორი ქვეყანა ასე ცდილობს აანაზღაუროს ცოცხალი ძალის ნაკლებობა.
ნოემბერში უკრაინული მედია უკვე იუწყებოდა, რომ შემოდგომის პირველ 2 თვეში რუსეთის კოლონიებში პატიმრების რაოდენობა 23 000-ით შემცირდა. ეს კი იმით იყო გამოწვეულია, რომ „ვაგნერი“ პატიმრების რეკრუტირებას ახდენდა.
უკრაინული მხარის ინფორმაციით, ბახმუტთან მოქმედებენ როგორც „მობილიზებულები“, ასევე ევგენი პრიგოჟინის „ვაგნერის“ დაქირავებული მებრძოლები. ამის მიუხედავად, რუსები უკვე არაერთი თვეა ცდილობენ ბახმუტის აღებას, მაგრამ ამას ჯერჯერობით ვერ ახერხებენ.
___
ამავე თემაზე:
კერძო სამხედრო დაჯგუფება „ვაგნერის“ წევრებმა გაიტაცეს და სიკვდილით დასაჯეს ყოფილი მსჯავრდებული, ევგენი ნუჟინი, რომელიც მანამდე უკრაინელთა ტყვეობაში იმყოფებოდა.
„ვაგნერმა“ სიკვდილით დასაჯა თავისი წევრი, რომელიც უკრაინის ტყვეობიდან დაბრუნდა
