ნეტგაზეთი • RU

ზელენსკი უნდა გაჩერდეს – ლუკაშენკოს მოწოდება

ბელარუსის პრეზიდენტის ალექსანდრ ლუკაშენკოს განცხადებით, ვოლოდიმირ ზელენსკი უნდა შეჩერდეს და სამშვიდობო მოლაპარაკებებს დათანხმდეს, თუ სურს, რომ უდიდესი მსხვერპლი და უკრაინის სრული განადგურება აიცილოს თავიდან.

„ახლა ყველაფერი უკრაინის ხელშია. იმიტომ კი არა, რომ მე ვცდილობ ეს თემა მთლიანად ზელენსკისა და უკრაინას გადავაბარო. არა, ნამდვილად, ყველაფერი უკრაინის ხელშია. თუ არ უნდათ დაღუპვა – ადამიანების უზარმაზარი მსხვერპლი.

რთულია, მაგრამ უნდა გაჩერდნენ, უნდა შეწყვიტონ ეს ყველაფერი, რადგან შემდეგ იქნება უკრაინის სრული განადგურება… ის კი არა, რასაც პუტინი ამბობდა „ოპერაციამდე“ დიდი ხნით ადრე, რომ უკრაინამ შეიძლება სახელმწიფოებრიობა დაკარგოს, არამედ ეს იქნება უკრაინის სრული განადგურება,“ – ამბობს ლუკაშენკო კრემლისტური მედიისთვის მიცემულ ინტერვიუში.

ის დასძენს, რომ მეორე მსოფლიო ომის დროს 30 მილიონი ადამიანი დაიღუპა (საბჭოთა კავშირის დანაკარგი), თუმცა დღეს ამას „აღარავინ იხსენებს“ და ყველა მზადაა გერმანიასთან არათუ „ილაპარაკოს, არამედ ითანამშრომლოს და იმეგობროს კიდეც“.

ბელარუსის პრეზიდენტის თქმით, ევროპა ნელ-ნელა ფხიზლდება და ძალიან მალე ევროპული სახელმწიფოების მოქალაქეები საკუთარი ლიდერების წინააღმდეგ შემობრუნდებიან, იგივე მოხდება უკრაინაშიც, რადგან ლუკაშენკოს თქმით, არა „ზელენსკი, არამედ უბრალო ხალხი იტანჯება“.

„ხალხი უკვე საკუთარ ხელისუფლებას უყენებს პრეტენზიებს. როდესაც ადამიანებს საჭმელი აღარ აქვთ, ზამთარია, მთელი ინფრასტრუქტურა, ფაქტობრივად, განადგურებულია და ამ დროს არის ალტერნატივა – სამშვიდობო მოლაპარაკებები. შეიძლება ასე არ უნდა ვამბობდე, მაგრამ ზელენსკი მშვენივრადაა, არაფერი უჭირს, გამოდის აქ მაისურით, გაურეცხავი ზედით ამდენი ხანია…

ასეთი შთაბეჭდილება რჩება. ვიღაცას მიესალმა, ვიღაცას ხელი ჩამოართვა, იმათაც სადღაც 200 მილიონი დოლარის „ჰაიმარსები“ თუ „ჯაველინები“ მისცეს. მისთვის უფრო იოლია. მაძღარია, ნაჭამია, არც უდენობით იტანჯება. სამაგიეროდ, მილიონობით ადამიანი იტანჯება. აგერ ნახეთ, ერთ-ორ წელიწადში ხალხი მას დაადანაშაულებს. არ აქვს მნიშვნელობა, ვინაა მართალი და ვინ მტყუანი, ხალხი მას დაადანაშაულებს – რატომ გქონდა შენს ტერიტორიაზე ომი?“

ლუკაშენკო დასძენს, რომ უკრაინაშიც და მთელ ევროპაშიც მწიფდება ვითარება, რომ მოლაპარაკებების დროა. მისი თქმით, უკრაინის საკითხი კოლექტიური უსაფრთხოების ხელშეკრულების ორგანიზაციის სამიტის მთავარი თემა არ ყოფილა, თუმცა ორგანიზაციის წევრი ქვეყნების ლიდერებმა ამ საკითხზეც ისაუბრეს.

ლუკაშენკოს განცხადებით მალევე, კრემლისტურმა მედიამ პუტინის პრესსპიკერის კომენტარი გაავრცელა. დმიტრი პესკოვის თქმით, კიევს შეუძლია რუსეთის მოთხოვნები შეასრულოს და ვითარება დაარეგულიროს.

„უკრაინის ხელისუფლებას აქვს ყველანაირი შესაძლებლობა, სიტუაცია ნორმალურ კალაპოტში გადაიყვანოს, აქვს ყველანაირი შესაძლებლობა, დაარეგულიროს სიტუაცია ისე, რომ შეასრულოს რუსული მხარის მოთხოვნები და ადგილობრივი ხალხის ტანჯვა შეწყვიტოს,“ – განაცხადა პესკოვმა, რომელსაც უკრაინის ენერგოინფრასტრუქტურაზე თავდასხმების შესახებ დაუსვეს შეკითხვა.

კრემლისა და მისი მოკავშირეების მხრიდან „სამშვიდობო მოწოდებებზე“ წერდა დღევანდელ ანგარიშში ომის კვლევის ამერიკული ინსტიტუტი (ISW). ინსტიტუტის ანალიტიკოსების შეფასებით, მოსკოვი ამ გზით თავისი მიზნების შენიღბვას და დასავლეთის დაბნევას ცდილობს.

„კრემლს არ უთქვამს უარი თავის მაქსიმალურ მიზნებზე უკრაინაში, ის მხოლოდ ამ მიზნების გაბუნდოვანებას ცდილობს, რათა დასავლეთის ქვეყნები შეცდომაში შეიყვანოს და უკრაინას მოლაპარაკებების მაგიდასთან დაჯდომა აიძულოს,“ – წერენ ინსტიტუტის ექსპერტები.

ISW-ი დასძენს, რომ მშვიდობისკენ მოწოდებების მიუხედავად, პუტინის, რუსი პოლიტიკოსებისა და კრემლის პროპაგანდისტების რიტორიკა ძალიან შორსაა სამშვიდობო მოლაპარაკებებისგან და ის პირდაპირ მიმართულია უკრაინელთა გენოციდისკენ.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.