ნეტგაზეთი • RU

კრემლის პროპაგანდის მტკიცებით, უკრაინა რუსეთში, ბელგოროდის ოლქში, აპირებს შეჭრას – ISW

ომის კვლევის ამერიკული ინსტიტუტის (ISW) შეფასებით, რუსეთის ბელგოროდის ოლქზე ე.წ. False-Flag თავდასხმისთვის კრემლი საინფორმაციო წინაპირობებს ქმნის. False-flag ოპერაცია იმგვარად მოწყობილი სამხედრო ქმედებაა, რომელიც კონფლიქტის მეორე მხარეს ბრალდება.

ანალიტიკოსების დაკვირვებით, მოსკოვი საინფორმაციო სივრცეში აძლიერებს ჰიპოთეზებს, თითქოს უკრაინის არმია ბელგოროდის ოლქში შეჭრას აპირებს.

ISW-ის ცნობით, ამგვარ ვარაუდებს ბოლო დღეებში კრემლის პროპაგანდისტები გამოთქვამენ, სხვა რუსული წყაროები კი ამტკიცებენ, რომ რუსეთისთვის აუცილებელია, დაიბრუნოს კონტროლი კუპიანსკზე, ხარკოვის ოლქში, რათა უკრაინის მხრიდან თავდასხმის საფრთხე მინიმუმამდე შეამციროს.

„ბელგოროდის გუბერნატორმა ვაიჩესლავ გლადკოვმა გამოაქვეყნა კადრები, რომლებშიც ჩანს, როგორ აწყობენ რუსები საფორტიფიკაციო ნაგებობებს ბელგოროდის ოლქში, უკრაინის საზღვართან,“ – წერენ ინსტიტუტის ექსპერტები და აღნიშნავენ, რომ კრემლი ასეთი პროპაგანდით უკრაინაში წამოწყებული ომისთვის საზოგადოების მხარდაჭერის დაბრუნებას ცდილობს.

ინსტიტუტის ანგარიშში აღნიშნულია, რომ რუსეთის სამხედრო აგრესიისადმი რუსეთის მოსახლეობის მხარდაჭერა წარუმატებელი მობილიზაციისა და ფრონტზე მუდმივი მარცხის გამო მცირდება.

საფორტიფიკაციო თხრილი ბელგოროდის ოლქში, უკრაინის საზღვართან/ფოტო: ვიაჩესლავ გლადკოვის ტელეგრამიდან

ანალიტიკოსების შეფასებით, რუსეთის განცხადებები უკრაინის გარდაუვალ თავდასხმაზე აბსურდულია და ფართო აუდიტორიის დაშინებისკენაა მიმართული.

„უკრაინას რუსეთში შეჭრისთვის არც სტრატეგიული ინტერესი აქვს და არც ასეთ მასშტაბებში ამის გაკეთების შესაძლებლობა“, – წერს ISW-ი.

ISW-ის ანგარიშის სხვა მთავარი მიგნებები:

  • რუსეთს მაღალი სიზუსტის რაკეტების არსენალი ძალიან შეუმცირდა, თუმცა ჯერ კიდევ აქვს რესურსი, უკრაინის ინფრასტრუქტურაზე თავდასხმა გააგრძელოს;
  • რუსეთის სარდლობა მაღალი სიზუსტის შეიარაღების მარაგის სხვადასხვა გზით შევსებას ცდილობს;
  • ბელარუსის პრემიერ-მინისტრი ირანში ჩავიდა. ვიზიტის მიზანი ეკონომიკურ და უსაფრთხოების სფეროებში თანამშრომლობაა;
  • რუსეთის არმიის გადაადგილების მარშრუტი მიუთითებს, რომ რუსეთის ჯარები იმაგრებენ პოზიციებს ზაპოროჟიეს აღმოსავლეთ და დონეცკის დასავლეთ ნაწილებში;
  • რუსული წყაროები ამტკიცებენ, რომ უკრაინის არმია განაგრძობდა კონტრშეტევის ოპერაციას სვატოვო-კრემენაიას ხაზზე;
  • რუსეთის ჯარები განაგრძობდნენ შეტევას ბახმუტისა და ავდეევკის რაიონში;
  • ყირიმის საოკუპაციო ხელისუფლება შეშფოთებულია უკრაინელთა დარტყმებით ყირიმის ლოგისტიკურ ქსელებზე და ასევე, საბრძოლო მოქმედებებით კინბურნის ნახევარკუნძულზე;
  • კრემლი ცდილობს, წარუმატებელი მობილიზაციის გამო პასუხისმგებლობა თავდაცვის უწყებას დააკისროს.

მთავარ ფოტოზე: საფორტიფიკაციო ხაზის მშენებლობა ბელგოროდში, უკრაინის საზღვართან/ფოტო: ვიაჩესლავ გლადკოვის ტელეგრამიდან

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.