დიდი ბრიტანეთის დაზვერვის შეფასებით, ლუგანსკის ოლქის ერთ-ერთი მსხვილი დასახლებული პუნქტის, სვატოვოს შენარჩუნებამ რუსეთისთვის პოლიტიკური მნიშვნელობა შეიძინა.
უწყების ცნობით, ბოლო შვიდი დღის განმავლობაში სვატოვოს სექტორში არ შეწყვეტილა საარტილერიო ბრძოლები. რაც შეეხება ფრონტის სხვა მონაკვეთებს, იქ რუსეთი თავდაცვითი პოზიციების მოწყობას განაგრძობს და ამის გაკეთებას ცუდად აღჭურვილი და ასევე ცუდად მომზადებული მობილიზებულების ხარჯზე ცდილობს.
„ახლა, როდესაც რუსეთისთვის უფრო იოლია დნეპრის აღმოსავლეთ სანაპიროს გასწვრივ ფრონტის სამხრეთ-დასავლეთ ხაზის დაცვა, სვატოვოს სექტორი რუსეთის ძალებისთვის ყველაზე დაუცველ ოპერატიულ ფლანგად რჩება,“ – წერს დაზვერვა 21 ნოემბრის რელიზში. – „როგორც ჩანს, რუსეთის სარდლობა სვატოვოზე კონტროლის შენარჩუნებას პოლიტიკურ პრიორიტეტს ანიჭებს.“
თუმცა უწყების შეფასებით, რუს მეთაურებს უჭირთ ერთდროულად თავდაცვითი და შეტევითი ოპერაციების წარმოება – საიმედო თავდაცვითი პოზიციების შექმნა სვატოვოს სექტორში და საკმარისი რესურსის უზრუნველყოფა დონეცკის შეტევებისთვის.
„რუსეთის თავდაცვისა და თავდასხმის შესაძლებლობებს კვალიფიციური პერსონალისა და საბრძოლო მასალების მწვავე ნაკლებობა ამცირებს,“ – ასკვნის დაზვერვა.
გაერთიანებული სამეფოს თავდაცვა უკრაინის შესახებ სადაზვერვო ცნობარს ყოველდღიურად აქვეყნებს. გუშინდელ რელიზში უწყება აღნიშნავდა, რომ სხვა შემთხვევებისგან განსხვავებით, ხერსონის დასავლეთ ნაწილიდან უკან დახევა რუსეთმა შედარებით ორგანიზებულებად და მცირე დანაკარგებით მოახერხა.
