ნოე ჟორდანიას, ნოე რამიშვილისა და ექვთიმე თაყაიშვილის პირადი ნივთების გამოფენა ბათუმში

საქართველოს დამოუკიდებლობის დღესთან, 26 მაისთან დაკავშირებით, დღეს, 12 მაისს, ბათუმში, „ვარდების სკვერში“  დამოუკიდებლობის დღესთან დაკავშირებული ექსპონატები გამოფინეს. გამოფენა ბათუმში 17:00 საათამდე გაგრძელდება, ხვალ კი ექსპონატებს ოზურგეთში  გამოფენენ.  საქართველოს მთავრობის მხარდაჭერით, საქართველოს პარლამენტის ეროვნული ბიბლიოთეკა ახორციელებს პროექტს, რომელიც ითვალისწინებს 1918 წლის საქართველოს დამოუკიდებლობის დღესთან დაკავშირებული ექსპონატების გატანას რეგიონებში.

 

პარლამენტის ეროვნული ბიბლიოთეკის წარმომადგენლის,  ჯული ცხვედიანის თქმით, გამოფენაზე წარმოდგენილია საქართველოს 1918 წლის დამოუკიდებლობის აქტი, 1919 წელს, ფრანგულ ენაზე დაბეჭდილი საქართველოს პირველი კონსტიტუცია, 1918-21 წლებში დაწესებული პირველი ქართული ჯილდო თამარ მეფის ორდერი, პირველი პრეზიდენტის, ნოე ჟორდანიას პირადი ნივთები – საბეჭდი მანქანა, ხელჯოხი და სამელნეები. აქვეა წარმოდგენილი ნოე რამიშვილისა  და ექვთიმე თაყაიშვილის ნაქონი ხელჯოხებიც.

 

ექსპონატები დასავლეთ საქართველოს ხუთ ქალაქში გამოიფინება, შემდეგ კი აღმოსავლეთ საქართველოს ქალაქებში გამოფენენ.