ნეტგაზეთი • RU

ერდოღანმა თქვა, რომ სტამბოლის აფეთქებაში ქალი მონაწილეობდა და ის ტერორიზმს დაუკავშირა

თურქეთის პრეზიდენტმა რეჯეფ თაიფ ერდოღანმა სტამბოლის ცენტრში მომხდარი აფეთქება ტერორიზმს დაუკავშირა და განაცხადა, რომ დაღუპულთა რიცხვი 6-მდე გაიზარდა, ხოლო დაშავებულთა – 53-მდე.

ამის შესახებ ერდოღანმა ინდონეზიაში გაფრენამდე გამართულ პრესკონფერენციაზე განაცხადა, იუწყება თურქეთის სახელმწიფო სააგენტო ანადოლუ.

„ჩვენი ერი დარწმუნებული უნდა იყოს, რომ ისტიკლალის ქუჩაზე მომხდარი ინციდენტში დამნაშავეები დაისჯებიან ისე, როგორც ისინი იმსახურებენ. ჩვენი სახელმწიფოს შესაბამისი სამსახურები ყველა ღონეს ხმარობენ ამ მზაკვრული თავდასხმის შემსრულებლებისა და მათ უკან მდგომი ასოციაციების გამოსავლენად“, – განაცხადა მან.

ერდოღანმა ასევე განაცხადა, რომ აფეთქების შესახებ პირველადი ინფორმაციით, ეს იყო ტერორისტული აქტი.

„პირველი მოვლენები, პირველი ინფორმაცია, რომელიც გუბერნატორმა მოგვაწოდა: აქ ტერორის სუნია“, – განაცხადა ერდოღანმა და დასძინა, რომ ინციდენტში ქალი მონაწილეობდა.

აფეთქება სტამბოლში, პოპულარულ საფეხმავლო ქუჩაზე ისტიკლალზე დღეს, შუადღისას მოხდა. აფეთქების ადგილი ტაქსიმიდან ექვსი წუთის სავალზე.

პროკურატურამ ტერორიზმის ფაქტზე გამოძიება დაიწყო.

თურქულმა მარეგულირებელმა კომისიამ მომხდარიდან დაახლოებით ერთი საათის შემდეგ ტელეარხებს აფეთქების შესახებ სიუჟეტების ტრანსლაცია აუკრძალა.

ნეტგაზეთის მასალების სხვა გამოცემებში გადაბეჭდვის წესი
ავტორი
ეთერ თურაძე არის გაზეთ "ბათუმელების" მთავარი რედაქტორი 2001 წლიდან