უკრაინის პრეზიდენტი ვოლოდიმირ ზელენსკი აცხადებს, რომ მას არასდროს უთქვამს უარი რუსეთთან და ვლადიმერ პუტინთან მოლაპარაკებებზე. თუმცა ვერ ხედავს მოსკოვის სურვილს, მშვიდობას კიევის პირობებით დათანხმდეს.
„მე კარი არ გამომიჯახუნებია. მე ვთქვი, რომ ჩვენ მზად ვართ რუსეთთან სალაპარაკოდ, მაგრამ სხვა რუსეთთან. ისეთთან, რომელიც ნამდვილად მზადაა მშვიდობისთვის. ისეთთან, რომელიც მზადაა აღიაროს, რომ ოკუპანტია,“ – უთხრა უკრაინის პრეზიდენტმა CNN-ს.
ზელენსკი დასძენს, რომ სამართლიანობის აღსადგენად, ის კვლავაც მოითხოვს უკრაინის ყველა ტერიტორიის, მათ შორის 2014 წელს ანექსირებული ყირიმის დაბრუნებას:
„ჯერჯერობით მე ასეთი განცხადებები რუსეთის ფედერაციისგან არ მომისმენია – არც პუტინისგან და არც ვინმე სხვისგან.“
რამდენიმე დღის წინ გამოცემა Politico წერდა, რომ მისი წყაროების ცნობით, ვოლოდიმირ ზელენსკიმ რუსეთთან და კერძოდ, ვლადიმერ პუტინთან მოლაპარაკებების შესაძლებლობაზე თავისი ხისტი პოზიცია ბაიდენის ადმინისტრაციის მცდელობების შემდეგ შედარებით შეარბილა.
მოგვიანებით, „უკრაინსკა პრავდასთან“ კომენტარებში, რამდენიმე მაღალჩინოსანმა დიპლომატიური წრეებიდან მსგავსი ინფორმაცია უარყო და აღნიშნა, რომ დასავლელი პარტნიორები არ ცდილობენ უკრაინის იძულებას, სამშვიდობო მოლაპარაკებებს დათანხმდეს.
როგორც სამშაბათს გამართულ ბრიფინგზე სახელმწიფო დეპარტამენტის წარმომადგენელმა, ნედ პრაისმა აღნიშნა, ვაშინგტონ ვერ ხედავს ნიშნებს, რომ მოსკოვი უკრაინასთან სალაპარაკოდ მზადაა. აშშ-ის პრეზიდენტის, ჯო ბაიდენის თქმით კი, მოლაპარაკებების საკითხი უკრაინაზეა დამოკიდებული.
