IT კომპანიის თანამშრომელი უკვე თვეზე მეტია მობილიზაციას რუსეთის სამხრეთში, უღრან ტყეში ემალება. მას უკრაინასთან ომში წასვლა არ სურს, თუმცა არც იმისთვის აღმოჩნდა მზად, ოჯახი სამშობლოში დაეტოვებინა და თვითონ უცხოეთში გაქცეულიყო.
ადამ კალინინი – გამოგონილი სახელია კაცისა, რომლის შესახებაც რეპორტაჟი Настоящее Время-მ მოამზადა.
ადამი ტყეში გაქცევამდეც ღიად გამოდიოდა ომის წინააღმდეგ, მონაწილეობდა საპროტესტო აქციებში, დააჯარიმეს და გარკვეული დროით დააკავეს კიდეც.
ტყეში კალინინის ცხოვრება ორ კარავს შორის იყოფა: ერთში „სახლია“, მეორეში – „ოფისი“.
„უცხოეთში წასვლას სხვადასხვა მიზეზით ვერ შევძლებდი. მარტო გაქცევაც არ მინდა. თუ წავალ, ცოლთან ერთად უნდა წავიდე. არის კიდევ ემოციური მომენტიც: არ მინდა ნათესავებსა და მეგობრებს მოვშორდე. არ მინდა, საკუთარი თავი მათ გეოგრაფიულად დავაშორო,“ – ეუბნება ჟურნალისტებს კალინინი, რომელიც ფიქრობს, რომ უღრან ტყეში ცხოვრება კიდევ კარგა ხანს მოუწევს.
„ვიდრე აქ ვარ, ახალი ამბები გაჩნდა, კერძოდ ეს დე-ფაქტო საომარი მდგომარეობა, უბრალოდ ამასაც რაღაცნაირად ვითომ „ნაწილობრივი“ დაარქვეს. ეს ფორმულირებები, სრულიად დაუკონკრეტებელი, დიდი მოედანია თვითნებობისთვის,“ – ამბობს ადამ კალინინი.
ადამი ტყიდან მუშაობასაც ახერხებს, ტელეგრამში საკუთარი არხი აქვს. საჭმელს თვითონ იმზადებს – რაციონი მოლაშქრისაა.
„სახლიდან“ დაახლოებით ერთი საათის სავალზე კალინინმა პროდუქტების საცავი მოაწყო და იქ კვირაში რამდენჯერმე, როგორც მაღაზიაში, ისე დადის.
თავისუფალ დროს ხეზე მუშაობს, დაფებს ამზადებს.
თავიდან ფიქრობდა, რომ ტყეში ასე ერთი თვით მოუწევდა დარჩენა, თუმცა ახლა ამბობს, რომ გეგმები შეიცვალა – „სახლში“ ღუმელის მოწყობას აპირებს, რადგან ფიქრობს, რომ ქალაქში დაბრუნება ჯერ ისევ საშიშია.
