რუსეთი და გერმანია პარტნიორები აღარ არიან, რუსეთის „სასტიკმა დამპყრობლურმა ომმა“ უკრაინის წინააღმდეგ ფეხქვეშ გათელა უსაფრთხოების ევროპული არქიტექტურა – განაცხადა გერმანიის პრეზიდენტმა ფრანკ-ვალტერ შტაინმაიერმა გერმანელი ხალხისადმი თავის საპროგრამო სიტყვაში.
შტაინმაიერის თქმით, „თავისი იმპერიალისტური სიგიჟით რუსეთის პრეზიდენტმა დაარღვია საერთაშორისო სამართალი, კითხვის ნიშნის ქვეშ დააყენა საზღვრები, დაიწყო ტერიტორიების დაპყრობა“.
მან ხაზი გაუსვა, რომ რუსეთმა უსარგებლოდ აქცია ყველა ის გაკვეთილი, რომელიც კი მსოფლიომ ორი მსოფლიო ომიდან გამოიტანა.
ახლა სამყარო, გერმანიის პრეზიდენტის სიტყვებით, „კონფრონტაციის ფაზაში“ იმყოფება, რადგან „მშვიდობის დივიდენდები ამოიწურა“.
„პუტინის თავდასხმა სამართალზე, ძალადობისგან უარის თქმის პრინციპებსა და საზღვრების ხელშეუხებლობაზე – ეს არის თავდასხმა ყველაფერზე, რის დაცვასაც გერმანელები ცდილობენ“, – განაცხადა შტაინმაიერმა.
პრეზიდენტის თქმით, გერმანია ყველაფერს აკეთებს დიპლომატიური გზების მოსაძებნად, თუმცა „ბოროტების პირისპირ მხოლოდ კეთილი ნება საკმარისი არაა“. შტაინმაიერი დასძენს, რომ რუსეთის „სულმდაბლური და კაცთმოძულეობრივი თავდასხმებისთვის“ სხვაგვარი სახელის დარქმევა შეუძლებელია.
როგორც გერმანიის პრეზიდენტი მიიჩნევს, მშვიდობის დამყარება ტერიტორიებზე უარის თქმის ხარჯზე გამორიცხულია.
„გამოსასყიდის სახით მათი რუსი ოკუპანტებისთვის გადაცემა ბევრი ადამიანისთვის უკრაინაში ბოროტების გამარჯვებას ნიშნავს“, – ამბობს შტაინმაიერი, რომელიც უკრაინაში რამდენიმე დღის წინ იმყოფებოდა.
გერმანიის პრეზიდენტმა თავისი ქვეყნის მოსახლეობასაც მიმართა, ძირითადად აღმოსავლეთ ნაწილის მცხოვრებლებს, რომლებიც მისი თქმით „გარკვეულ კავშირს გრძნობენ რუსეთთან და რუსული მუსიკა და ლიტერატურა უყვართ“.
„ახლა, როდესაც რუსეთს ვუყურებთ, რომანტიკისთვის არანაირი ადგილი არ რჩება. დღეს ჩვენი ქვეყნები ერთმანეთის მოწინააღმდეგეები არიან.
ორი წლის შემდეგ ჩვენ გვინდა ვთქვათ, რომ ჩვენ გადავლახეთ ეკონომიკური კრიზისი. ხუთი წლის შემდეგ გვენდომება ვთქვათ, რომ მხოლოდ უკრაინა არ იბრძოდა საკუთარი სუვერენიტეტისთვის, ჩვენც არ უნდა გვეშინოდეს ახალი ომების ევროპაში. ათი წლის მერე გვინდა ვთქვათ, რომ ჩვენ გადავარჩინეთ საზოგადოება გახლეჩისგან და უმრავლესობამ შეინარჩუნა დემოკრატიის რწმენა. გვინდა 15 წლის შემდეგ ვთქვათ, რომ ომისა და კრიზისის მიუხედავად, ჩვენ შევძელით ჩვენს პლანეტაზე მომავალი თაობებისთვის კარგი ცხოვრების უზრუნველყოფა,“ – განაცხადა შტაინმაიერმა.
ფრანკ-ვალტერ შტაინმაიერი კიევში 25 ოქტომბერს ჩავიდა. ეს მისი პირველი ვიზიტი იყო ომის დაწყების შემდეგ. მანამდე, ჯერ კიდევ აპრილში, უკრაინის ხელისუფლებამ გერმანიის პრეზიდენტს კიევში ჩასვლაზე უარი უთხრა რუსეთთან მისი ახლო კავშირების გამო, თუმცა როგორც მოგვიანებით გავრცელდა ინფორმაცია, შტაინმაიერმა და ზელენსკიმ ტელეფონით ისაუბრეს და უთახმოება ამოწურეს.
