ჩეჩნეთის მეთაურმა, რამზან კადიროვმა აღიარა, რომ 24 ოქტომბერს ხერსონში კადიროველთა ბაზაზე დარტყმის შედეგად მისი რაზმის 23 მებრძოლი დაიღუპა და 58 დაიჭრა.
„ბევრმა იცის, რომ მიმდინარე კვირის დასაწყისში ერთ-ერთი ჩეჩნური დაჯგუფება საარტილერიო დარტყმის ქვეშ აღმოჩნდა. ეს ხერსონის ოლქში მოხდა. სამაშველო სამუშაოები დასრულებულია და გვაქვს დაღუპულთა და დაჭრილთა საბოლოო სია.
23 მებრძოლი დაიღუპა და 58 დაიჭრა. ოთხ მათგანს მძიმე ტრავმები აქვს, თუმცა მათ სიცოცხლეს საფრთხე არ ემუქრება,“ – დაწერა კადიროვმა თავის ტელეგრამარხზე.
ჩეჩნეთის მეთაურმა დასძინა, რომ იმ დღეს „დამპყრობელთა დანაკარგი უფრო დიდი იყო“ და რომ „ჩეჩნები მონაწილეობენ ჯიჰადში და იბლისის ძალების წინააღმდეგ იბრძვიან“.
მისი თქმით, „ამ წმინდა ომში სიკვდილი უდიდესი პატივი და ბედნიერებაა ნებისმიერი ჭეშმარიტი მუსლიმისთვის“.
25 ოქტომბერს უკრაინის გენშტაბმა დაადასტურა, რომ ხერსონის ოლქის დასახლებულ პუნქტ კაირიში 30 ოკუპანტი გაანადგურეს.
წინა დღეს კი სოციალურ ქსელებში გავრცელდა ვიდეო (სავარაუდოდ, სწორედ სოფელ კაირიდან), რომელშიც გადარჩენილი ჩეჩენი მებრძოლები ჩანან. გავრცელებული ინფორმაციით, უკრაინის დამცველებმა ოკუპირებულ ხერსონი ოლქში კადიროველთა ბაზას დაარტყეს.
კადიროველებზე თავდასხმის შემდეგ, ჩეჩნეთის მეთაურმა რამზან კადიროვმა ჩეჩნებს მოუწოდა შეუერთდნენ „სატანიზმთან“ ბრძოლას და უკრაინასთან ომს ჯიჰადი უწოდა.
___
კადიროვს სურს ლიმანის დაკარგვისთვის რუსი გენერალი ჯარისკაცად ჩამოაქვეითოს და ომში გაუშვას
