დიდი ბრიტანეთის დაზვერვის ინფორმაციით, ხერსონის ოლქში, დნეპრის დასავლეთ სანაპიროზე მყოფი საკუთარი ძალები რუსეთმა სავარაუდოდ მობილიზებული რეზერვისტებით გააძლიერა, თუმცა უწყების შეფასებით, ეს დანაყოფები ცუდადაა მომზადებული და დაუკომპლექტებელია.
„2022 წლის სექტემბერში რუსი ოფიცრები ასეულებს ხერსონის მიმართულებაზე აღწერდნენ, როგორც 6-8 ადამიანისგან შემდგარ დანაყოფებს, მაშინ, როდესაც ასეულში დაახლოებით 100 ადამიანი მაინც უნდა იყოს,“ – წერს ბრიტანეთის დაზვერვა 28 ოქტომბრის რელიზში.
უწყების შეფასებით, ბოლო ექვს კვირაში ცხადად გამოჩნდა, რომ უკრაინის ფრონტის ხაზის უმეტეს მონაკვეთებზე რუსეთის სახმელეთო ძალები თავდაცვით პოზიციებზე გადავიდნენ.
„სავარაუდოდ, ეს დაკავშირებულია სიტუაციის უფრო რეალისტურ შეფასებასთან, რომლის თანახმადაც, დაუკომპლექტებელ და ცუდად გაწვრთნილ რუსულ ძალებს უკრაინაში დღეს მხოლოდ თავდაცვითი ოპერაციების უნარი აქვთ,“ – მიუთითებს უწყება და დასძენს, რომ მაშინაც კი თუ რუსეთი უკრაინაში გრძელვადიანი თავდაცვითი ზღუდეების შექმნას შეძლებს, მისი ოპერატიული სქემა დაუცველი დარჩება.
„იმისთვის, რომ ინიციატივა დაიბრუნოს, რუსეთს დასჭირდება უფრო ხარისხიანი, მობილური ძალები, რომლებსაც შეეძლებათ წინააღმდეგობა გაუწიონ უკრაინელთა კონტრშეტევებს და ამავე დროს, თავადაც აწარმოონ მსხვილმასშტაბიანი შეტევითი ოპერაციები.“
უკრაინის გენშტაბის ინფორმაციით, რუსეთმა ხერსონში 1000 მობილიზებული ჯარისკაცი შეიყვანა.
გაერთიანებული სამეფოს თავდაცვა უკრაინის შესახებ სადაზვერვო ცნობარს ყოველდღიურად აქვეყნებს. გუშინდელ რელიზში დაზვერვა აღნიშნავდა, რომ კრემლი ცენტრალური ხელისუფლებიდან საზოგადოების ყურადღების რეგიონულ ჩინოვნიკებზე გადატანას ცდილობს.
