უკრაინულმა კომპანიამ შექმნა ახალი უპილოტო საავიაციო კომპლექსი Shark, რომელსაც სხვა დავალებების შესრულებასთან ერთად, ამერიკული საარტილერიო სისტემა HIMARS-ისთვის ცეცხლის კორექტირებაც შეუძლია.
„ფაქტობრივად, უკვე ომის პირობებში მიდიოდა „შარკზე“ მუშაობა. ეს არის ჩვენი კომპანიის ოპერატიული პასუხი უკრაინის არმიის გამოწვევებსა და საჭიროებებზე. „შარკი“ უკვე სრულ საბრძოლო მზადყოფნაშია,“ – ამბობენ კომპანია „უკრსპეცსისტემში“, რომელმაც უპილოტო საფრენი აპარატი შექმნა.
კომპანიაში დასძენენ, რომ ამ მზვერავი დრონის შესაქმნელად, პროექტიდან პირველ ფრენამდე, დაახლოებით ექვსი თვე დასჭირდათ: „შარკი“ სპეციალურად შექმნილია მტრის კონტროლირებად ტერიტორიაზე სამუშაოდ, საფუძვლიანი საჰაერო დაზვერვისა და კორექტირებისთვის, მათ შორის დასავლური შორსმოქმედი შეიარაღებისთვის, ისეთისთვის, როგორიც HIMARS-ია.“
ფოტო: „უკრსპეცსისტემსი“
„შარკს“ ასევე აქვს საიმედო დაშიფრული კავშირი და კამერა 30-ჯერადი ოპტიკური გადიდებით და დამატებითი ციფრული ზუმით, რომელთა დახმარებითაც მას შეუძლია შევიდეს მტრის ზურგში 60 კილომეტრის სიღრმეში და ობიექტების დაზვერვა აწარმოოს 5 კილომეტრის რადიუსში.
„შარკის“ ტექნიკური მახასიათებლები:
- ფრენის დრო – 2 საათი;
- კავშირის მანძილი – 60 კმ;
- პრაქტიკული ჭერი – 2000მ;
- კამერა – Full HD 30-ჯერადი ოპტიკური გადიდებით და დამატებითი ციფრული ზუმით;
- ასაფრენი წონა – 10კგ;
- ფრთების შლილი – 1,91 მ;
- გაშლის დრო – 15 წთ;
- ექსპლუატაციის ტემპერატურა – -15 C დან +50 C-მდე;
- დაშიფვრის მეთოდი – AES256;
- კრეისერული სიჩქარე – 70-90კმ/სთ;
- ფრენის მაქსიმალური სიჩქარე – 150 კმ/სთ;
- მინიმალური სიჩქარე – 60კმ/სთ;
- აფრენის მეთოდი – კატაპულტი;
- დასმის მეთოდი – პარაშუტი.
https://youtu.be/xAnSjot9sGY
„უკრსპეცსისტემსი“ უკრაინული კომპანიაა, რომელიც 2014 წელს შეიქმნა. ის სამხედრო სამოქალაქო უპილოტო საფრენ აპარატებს, მართვის სახმელეთო სადგურებს, მათ კომპონენტებს აწარმოებს და პროგრამულ უზრუნველყოფას ეწევა.
კომპანია ორი კლასის უპილოტო აპარატებს უშვებს – ოპერატიულ ტაქტიკური დონის PD-2 და ტაქტიკური საფრენი აპარატი „შარკი“.
მთავარი ფოტოზე: „შარკი“/ფოტო:„უკრსპეცსისტემსი“
