მთავარი,სიახლეები

კალაპოტიდან გადმოვიდა მდინარეები, რამაც გამოიწვია მიმდებარე ქუჩების დატბორვა – ბათუმის მერია

27.10.2022 • 3605
კალაპოტიდან გადმოვიდა მდინარეები, რამაც გამოიწვია მიმდებარე ქუჩების დატბორვა – ბათუმის მერია

„უხვი ნალექის გამო“ – ბათუმის მერიაში ამჯერადაც ეს მიზეზი დაასახელეს ქუჩების და საცხოვრებელი სახლების მასობრივი დატბორვის მიზეზად. „ბათუმის წყალში“ ვერ გვიპასუხეს, რატომ ვერ გვარდება დატბორვის პრობლემა წლებია და რატომ დაიტბორა ამჯერად ის ადგილებიც, რაც მანამდე არ დატბორილა, მათ შორის, ევროპის მოედანი?

„როგორც მერიაში, ასევე 112-ში სულ დაფიქსირდა 50-მდე ზარი. მოხდება ყველა შემთხვევის შესწავლა, კომისიური წესით განხილვა და შესაბამისი დახმარების გაწევა,“ – მოგვწერეს ბათუმის მერიის მუნიციპალური სერვისების განვითარების სააგენტოს პრესცენტრიდან.

„უხვ ნალექთან დაკავშირებით ბათუმში სალიკვიდაციო სამუშაოები მიმდინარეობს,“ – მოგვწერეს „ბათუმის წყლის“ პრესცენტრიდან, სადაც განმარტეს, რომ მობილური ჯგუფების მიერ ხორციელდება სანიაღვრე ჭებისა დ არხების გაწმენდა, ასევე შესაბამისი სალიკვიკადიო ღონისძიებები.

„უხვი ნალექის გამო კალაპოტიდან გადმოვიდა მდინარეები, რამაც გამოიწვია მიმდებარე ქუჩების დატბორვა. შემოერთებულ ტერიტორიაზე დაფიქსირდა მიწის მასის ჩამოშლა. წყლის დროულად გადინების მიზნით, გახსნილია ზღვაში გამსვლელი ყველა სანიაღვრე არხი,“ – გვითხრეს „ბათუმის წყალში“.

ამ უწყებაში ვითხოვეთ დაესახელებიათ ის მდინარეები, რამაც გამოიწვია ბათუმის ქუჩების დატბორვა? – „ბათუმის წყლის“ პრესცენტრში გვითხრეს, რომ გადმოვიდა ბონის კულტურის სახლთან გამავალი არხი, ასევე კიდევ ერთი სანიაღვრე არხი კალანდაძის ქუჩაზე.  უწყებაში მდინარეებზე კონკრეტული ინფორმაციის მოწოდების ნაცვლად, გვირჩიეს ეს: „რაც მოგაწოდეთ, იმით იხელმძღვანელეთ“.

მიწის მასა კონკრეტულად ურეხის დასახლებაში, დიდგორის ქუჩაზე ჩამოიშალა – მეწყერმა წაიღო ქვის დამცავი კედელი, რაც ბათუმის მერიამ მოაწყო.

„უხვი ნალექის შედეგად ჩამოწვა მიწა. პირველ ეტაპზე მოხდება დაზიანებული კდელის დემონტაჟი. შემდგომ კი, ახალი კედლის მოწყობას განახორციელებს შემსრულებელი კომპანია საგარანტიო პერიოდის ფარგლებში,“ – მოგვწერეს ბათუმის მერიის ინფრასტრუქტურის და კეთილმოწყობის სამმართველოს პრესცენტრიდან. აქ ვერ დაგვიკონკრეტეს: როდის შესრულდა ეს სამუშაობი და რა თანხა დაიხარჯა ქვის ღობის მოსაწყობად.

ქუჩების და, მათ შორის, ქალაქის შემოსასვლელთან ცენტრალური გზის დატბორვა მრავალსაათიან საცობსაც იწვევს. ბათუმის მერიას არაფერი მოუწერია სხვა გეგმის შესახებ, თუ როგორ უნდა მოგვარდეს ეს პრობლემა.

გადაბეჭდვის წესი