ვიქტორ განიჩი უკრაინელი სამხედროა, რომელიც საკუთარი ქვეყნისა და ოჯახის დასაცავად ფრონტზე მოხალისედ წავიდა. ვიქტორის მშობლები კიევში ცხოვრობდნენ, სახლში, რომელსაც 17 ოქტომბერს კამიკაძე-დრონის მიერ ნასროლი რაკეტა დაეცა.
ვიქტორი თავის დანაყოფთან ერთად უკრაინის სამხრეთში იბრძვის. იხსენებს, რომ ომის დასაწყისში, როდესაც მოხალისედ წასვლა გადაწყვიტა, მშობლებმა უსიტყვოდ დაუჭირეს მხარი.
„ყოველთვის ვეუბნებოდი, მივდივარ, რომ თქვენც დაგიცვათ, აქ უფრო უსაფრთხოდ რომ იყოთ-მეთქი“, – ეუბნება უკრაინის 24-ე არხს ვიქტორი, რომელიც ზუსტად დაბომბვამდე რამდენი დღით ადრე ჩავიდა კიევში მშობლების მოსანახულებლად.
17 ოქტომბრის დილას, როდესაც საჰაერო განგაშის ხმა გაიგონეს, სასწრაფოდ თავშესაფარში ჩასვლა გადაწყვიტეს.
ვიქტორ განიჩი მშობლების სახლთან კიევში/ფოტო: 24-ე არხი
„გავიგონეთ თუ არა, იმწამსვე დავიწყეთ მზადება. მე ჩაცმული ვიყავი უკვე და მშობლებმა მითხრეს, მიდი, სადარბაზოს კარი გააღე, ფეხზე ჩავიცვამთ და ჩამოვალთო. როგორც კი სადარბაზოდან გავედი, პირდაპირ ჩვენს ბინას მოხვდა რაკეტა. 10 წამი იყო სულ ალბათ გასული,“ – იხსენებს ვიქტორი.
სახლის მარცხენა ნაწილიდან, რომელიც ნაკლებად იყო დაზიანებული, ჯერ კიდევ გამოჰყავდათ ხალხი. ჯარისკაცის მშობლები კი კორპუსის მარჯვენა ნაწილში, საკუთარი ბინის ნანგრევებში იპოვეს. ორივე ადგილზე დაიღუპა.
დაიწვა ვიქტორის დოკუმენტები, ფორმა და აღჭურვილობაც.
„ვიცი, რომ უკეთეს ადგილას არიან და ვეღარ ხედავენ ამ ყველაფერს. ახლა მხოლოდ 84 წლის ბებია დამრჩა, მაგრამ დამრჩა ბრძოლის სურვილიც. თანამებრძოლებიც ყველანაირად დამეხმარნენ. და რა ვქნა სხვა? ხელები ჩამოვუშვა? არა, არ შეიძლება, ამის შემდეგ მით უმეტეს არ შეიძლება“.
კითხვაზე, რუსი სამხედროებისთვის რამეს თქმას ხომ არ მოისურვებდა, ვიქტორი პასუხობს, რომ არა, რადგან მათთან ლაპარაკი უკვე შეუძლებელია.
„არაფერს ვეტყოდი, გავანადგურებდი მხოლოდ. მაინც არაფერი ესმით. ტყვედაც კი არ ავიყვანდი მათ, რომ შეიძლებოდეს, მაგრამ ესაა, რაც ჩვენ მათგან განგვასხვავებს,“ – ამბობს ის.
ვიქტორ განიჩის მშობლების სახლი აფეთქების შემდეგ/ფოტო: საგანგებო სიტუაციების სამსახური
ვიქტორი ყველა მოქალაქეს ურჩევს, არავითარ შემთხვევაში არ დატოვონ უყურადღებოდ საჰაერო განგაშის სიგნალი.
„შეიძლება, სამოქალაქო პირებს ჰგონიათ, რომ ეს სადღაც შორსაა და შეუძლიათ არაფერი გააკეთონ, მაგრამ ასე არაა. ყოველ ჯერზე საჭიროა რეაგირება.“
17 ოქტომბერს, უკრაინის ქალაქების მორიგი დაბომბვის დროს, კიევში, ვიქტორის მშობლების სახლში, 5 ადამიანი დაიღუპა. მათ შორის ორსული ქალი.
მთავარ ფოტოზე: ვიქტორ განიჩი/24-ე არხის კოლაჟი
