ქობულეთში, 26 მაისის ქუჩაზე, ზღვასთან ახლოს მდებარე ცენტრალური საავადმყოფოს შენობები და მიმდებარე ტერიტორია, 7241 კვ.მეტრი აჭარის მთავრობამ პირობიანი ელექტრონული აუქციონის წესით გაყიდა. შემძენი შპს „ქობულეთის ცენტრალური საავადმყოფო ბომონდია“, რომლის 100 პროცენტსაც შპს „სამედიცინო საინვესტიციო ჯგუფი“ ფლობს.
შპს „სამედიცინო საინვესტიციო ჯგუფის“ 100 პროცენტი მამუკა მიქაძეს ეკუთვნის.
მონიშნულია გაყიდული საავადმყოფოს ტერიტორია, წითლად მონიშნულია მომიჯნავე ნაკვეთი, რომელიც სახელმწიფოს ბალანსზეა
კომპანიამ ქობულეთის ცენტრალური საავადმყოფოს შენობა აუქციონზე ერთი ბიჯით, უკონკურენტო პირობებში, 3 მილიონ 680 000 ლარად იყიდა და 10 მილიონი ლარის ინვესტიციის განხორციელების ვალდებულება აიღო.
აუქციონის პირობების მიხედვით, კომპანიამ წინასწარ გაწერილ ვადებში უნდა დაიწყოს შენობების რეკონსტრუქცია და ასევე, ააშენოს სამედიცინო დანიშნულებით ახალი შენობა. სამედიცინო დაწესებულების ამოქმედებიდან 10 წლის ვადაში კი ამ შენობებს პროფილი უნდა შეუნარჩუნოს.
კომპანიამ, აიღო ასევე საქართველოს 100 მოქალაქის დასაქმების ვალდებულება.
ქობულეთის მერია უარყოფს გავრცელებულ ინფორმაციას იმის თაობაზე, რომ საავადმყოფოს შემძენს ტერიტორიაზე სხვა ფუნქციის შენობის აშენებაც სურს. მერიის არქიტექტურის სამსახურის ინფორმაციით, კომპანიამ მათ მიმართა პროექტის შეთანხმების მოთხოვნით, რომელიც ხუთსართულიანი შენობის მშენებლობას ითვალისწინებს სარეაბილიტაციო ცენტრის მოწყობის მიზნით.
აქვე უნდა ითქვას, რომ თავიდან შპს „ამბასადორი ბათუმიც“ აცხადებდა, რომ ბათუმის ბულვარში მხოლოდ ოთხსართულიან სარეაბილიტაციო ცენტრს აშენებდა, შემდეგ კი 21-სართულიანი სასტუმრო ააშენა.
