ახლახან გათავისუფლებულ უკრაინულ ტერიტორიებზე უკვე დაახლოებით 1000 დაღუპული ადამიანის ცხედარი იპოვეს – მათ შორის არიან სამხედროებიც და მოქალაქეებიც.
უკრაინის რეინტეგრაციის სამინისტროს ინფორმაციით, საექსჰუმაციო სამუშაოები გრძელდება და უფრო ზუსტი რაოდენობა მათი დასრულების შემდეგ გახდება ცნობილი.
„სამძებრო სამუშაოების შედეგად უკვე ექსჰუმირებულია ჩვენი დაღუპული გმირებისა და მშვიდობიანი მოქალაქეების დაახლოებით 1000 ცხედარი. მათ შორის, თითქმის 450 იზიუმში – ერთ-ერთ ყველაზე მასობრივ სამარხში.
ცნობილი ხდება ოკუპანტების სისასტიკის დამადასტურებელი შოკისმომგვრელი ფაქტები: დაღუპულთა შორის არამხოლოდ სამხედროები, არამედ სამოქალაქო პირებიც არიან – უფროსებიც და ბავშვებიც,“ – ნათქვამია სამინისტროს განცხადებაში.
უკრაინული მედიის ცნობით, იზიუმში მასობრივი სამარხის შესწავლა და ცხედრების ექსჰუმაცია 23 სექტემბერს დასრულდა – სულ ნაპოვნია 447 ცხედარი, მათ შორის არიან ბავშვებიც.
25 სექტემბერს პრეზიდენტმა ვოლოდიმირ ზელენსკიმ განაცხადა, რომ დეოკუპირებულ იზიუმში კიდევ ერთი მასობრივი სამარხი აღმოაჩინეს.
17 ოქტომბერს სამართალდამცველებმა გაავრცელეს ინფორმაცია, რომ ლიმანში 187 ცხედარი იპოვეს – მათ შორის 35 სამხედროა, ხოლო 152 – სამოქალაქო პირი.
მთავარ ფოტოზე: ცხედრების ექსჰუმაცია იზიუმში/ფოტო: ხარკოვის სამხედრო ადმინისტრაცია
