როცა მეზობლის ბინიდან ყველაფერი გესმის – თხელი კედლების პრობლემა ახალ კორპუსებში

„არ მინდა, მეზობლის საუბარი მოვისმინო, არ მინდა, სხვის ამბებში ჩართული ვიყო, ძალიან უხერხულია. ხანდახან ტელევიზორს საგანგებოდ ვრთავ, რომ ხმები გადავფარო“ – გვიყვება თეონა ხარაბაძე. ის ოჯახთან ერთად ბათუმში, 26 მაისის ქუჩაზე, ახალაშენებულ კორპუსში ცხოვრობს.

თეონა ერთ-ერთია ახალ კორპუსებში მცხოვრებ იმ მოქალაქეებს შორის, რომლებსაც მკაფიო ხმები მეზობელი ბინიდან მრავალმხრივ დისკომფორტს და ამავდროულად უხერხულობას უქმნის:

„ეს მართლა არღვევს პირად სივრცეს. სტუმარი თუ გყავს და რამდენიმე ადამიანი ერთდროულად საუბრობს, მათი ხმები გადის და ასევე მეზობლისგანაც შემოდის. გარდა ამისა, არ გინდა მიყურადების მსხვერპლი გახდე, ან პირიქით, შენ მოუსმინო სხვას. თუმცა სხვანაირად ფიზიკურად შეუძლებელია. “

მათ, ვისაც ახალაშენებულ კორპუსში შეძენილი ბინა ჯერ არ გაურემონტებია, ასეთ ბინებში მცხოვრები მოქალაქეები ურჩევენ, ხმის იზოლაციის პრობლემისთვის საჭირო მოწყობილობები თავიდანვე გაითვალისწინონ, რადგან პრობლემის მოგვარება რემონტის დასრულების შემდეგ კიდევ დამატებით სხვა გამოწვევებს უკავშირდება: „თანაც, ეს საკმაოდ ძვირი სიამოვნებაა“.

როგორც ჩანს, მშენებელი კომპანიები, რომლებიც შიდა კედლებს ე.წ. „ათიანი“ ბლოკით აშენებენ, ხმის იზოლაციის პრობლემაზე ნაკლებად ფიქრობენ. მომავალში ეს მათი პრობლემა არ არის. მითუმეტეს, რომ ამ საკითხს სამშენებლო კოდექსი ან რაიმე სხვა რეგულაცია არ არეგულირებს.

„რამდენჯერმე იყო შემთხვევა, როცა ტელეფონი რეკავდა და ვეძებდი, მეგონა, ჩემთან რეკავდნენ. შემდეგ აღმოვაჩინე, რომ მეზობელთან რეკავდა ტელეფონი და მე ვეძებდი ჩემს ტელეფონს“ – გვიყვება ნათია შავაძე.

ის ამბობს, რომ ხმები მეზობლის ბინიდან, ბევრ სხვა გარემოებასთან ერთად, იმის ერთ-ერთი მიზეზია, რომ ახალაშენებული კორპუსის ბინაში მუდმივად ცხოვრებაზე უარი თქვა:

„ბინა ვერ აღვიქვი მუდმივ საცხოვრებლად. განსაკუთრებული დისკომფორტია ღამის საათებში, როცა შედარებით სიჩუმეა, იმდენად მკაფიოდ ისმის ხმები, თუკი ადამიანი ხმამაღლა საუბრობს და არ უფრთხილდება, რომ ვიღაც შეიძლება შეაწუხოს. ცოტა ხმამაღლა თუ საუბრობს, ჩვეულებრივად ისმის რას ამბობს. ერთი მომენტია, რომ ეს ჩემთვისაც უხერხულია, როცა არ მინდა ვინმეს ამბებში ვიყო ჩართული და მეორეა, რომ შენც გაწუხებს, გიფრთხობს ძილს შუაღამით.

ერთი შეხედვით, თითქოს არ არის კედელი თხელი“.

ახალაშენებულ კორპუსებში მცხოვრებლებისთვის, რომლებსაც მეზობლების ბინიდან ხმაური აწუხებთ, ცალკე განხილვის საგანია მცირეწლოვანი ბავშვების ხმაურით გამოწვეული უხერხულობა. ამავდროულად მიიჩნევა, რომ ბავშვის შეზღუდვაც არ არის სასურველი.

„ორმაგად რთულია, როცა გყავს ბავშვი, ის თამაშობს, ხმაურობს, მუსიკას უსმენს – ეს უხერხულობასაც იწვევს. განსაკუთრებით საღამოს საათებში ვცდილობ ბავშვმა არ ითამაშოს იმ მხარეს, რომელიც მეზობლის მისაღებ ოთახს ესაზღვრება. ასე ვუფრთხილდებით ერთმანეთს და ეს ძირითადად მეზობლების კეთილ ნებაზეა დამოკიდებული.

გარდა ამისა, მე და ჩემმა მეუღლემ ბავშვის ოთახი მიზანმიმართულად არ მოვაწყვეთ იმ სივრცეში, რომელიც მეზობელი ბინის კედელს ესაზღვრებოდა, ვიფიქრეთ, რომ ღამით ბავშვის უძილობის დროს არ შეგვეწუხებინა მეზობელი“ – ამბობს ნათია შავაძე.

იგი მიიჩნევს, რომ ეს საკითხი მშენებლის სინდისზე არ უნდა დარჩეს და ხმის იზოლაციის საკითხის გათვალისწინება მშენებელს კანონით გათვალისწინებული რეგულაციებით უნდა ევალებოდეს. მისი აზრით, წინააღმდეგ შემთხვევაში ეს შეიძლება ადამიანის უფლებების დარღვევადაც კი განვიხილოთ, როცა შეძლება უნებლიეთ გახდე მიყურადების მსხვერპლი ან სხვისი ამბის მონაწილე.

სპეციალისტების განმარტებით, მეზობელი ბინიდან რომ ხმა არ ისმოდეს, აუცილებელია ხმის იზოლაცია  და ეს მხოლოდ ე.წ. ათიანი ბლოკის გამოყენებას არ უნდა დავაბრალოთ, რადგან 20 სმ სისქის კედლებიდანაც კი ისმოდეს ხმა მეზობელ ბინაში.

„გარკვეულ პარამეტრებს უნდა აკმაყოფილებდეს ბგერა-იზოლაცია.  კედლის სისქე და ასევე, მისი დამუშავება უნდა იყოს შესაბამისი.

ბინაში შეიძლება იყოს კედლის სისქე 10 სანტიმეტრი, მაგრამ სხვადასხვა ბინებს შორის ხმის იზოლაცია უნდა იყოს დაცული. აკეთებდნენ, მაგალითად, ორმაგ ტიხარს და შუაში ტოვებდნენ სიცარიელეს. ათიანსა და ათიან ტიხარს შორი 4-სანტიმეტრიანი ჰაერის ფენა იყო, სხვადასხვა ხერხს იყენებდნენ.

ან საიზოლაციო პანელს აკრავენ ხოლმე კედელზე. ახლა უკვე მშენებლები, როგორც ჩანს, არ იცავენ ამ წესებს. მე მაქვს სახლი ნანახი, რომელსაც გარე კედელი ჰქონდა 10 სმ სისქის, მაშინ როცა 25 სმ-ზე ნაკლები არ შეიძლება“ – ამბობს არქიტექტორი გია რამიშვილი.

_______________

ფოტოზე: ბათუმი. ფოტო „ბათუმელების“ არქივიდან