განათლების სამინისტროს ინფორმაციით, საჯარო სკოლის დირექტორობის მსურველთა სერტიფიცირების პროცესი იწყება.
სერტიფიცირება მოიცავს ორ ეტაპს – ტესტირებასა და გასაუბრებას.
დირექტორობის სერტიფიცირებისთვის რეგისტრაცია 24 ოქტომბერს იწყება.
სამინისტროს ინფორმაციით, სერტიფიცირების პროცესში მონაწილეობა შეუძლიათ უმაღლესი განათლების მქონე საქართველოს მოქალაქეებს, რომელთაც მუშაობის არანაკლებ სამწლიანი გამოცდილება აქვთ.
„2020 წელს გამოცხადებულ დირექტორობის მსურველთა შესარჩევი კონკურსის ფარგლებში უკვე დარეგისტრირებულ პირებს ხელახალი რეგისტრაცია აღარ სჭირდებათ“, – ამბობს სამინისტრო.
26 ოქტომბრიდან კი დირექტორობის მსურველებს საშუალება ექნებათ ელექტრონული რესურსების პორტალზე ვებინარის სახით მიიღონ კონსულტაცია შემდეგ თემებზე:
- სკოლის დირექტორის სტანდარტი
- განათლების ხარისხის მართვის მექანიზმები
- სკოლის სტრატეგიული დაგეგმვა და განვითარება
- სასკოლო კურიკულუმის შემუშავება
- სასკოლო კურიკულუმის დანერგვა: მოსწავლეზე ორიენტირებული პროცესი
- სასკოლო კურიკულუმის მონიტორინგი და შეფასება
- ადამიანური რესურსების მართვა და განვითარება
- ადამიანებისა და პროცესების უსაფრთხოება
- მატერიალური და ფინანსური რესურსების მართვა
- საინფორმაციო რესურსები და სტრატეგიული კომუნიკაცია
- მოსწავლეთა უფლებების დაცვა და მათი მხარდაჭერის ღონისძიებები
- სასკოლო კულტურის ფორმირება
სერტიფიცირებით დაინტერესებულ პირებს ასევე შეუძლიათ კონკრეტული შეკითხვები გააგზავნონ ელექტრონულ ფოსტაზე: directors@emis.ge.
სამინისტროს განცხადებით, 2022 წელს, საერთაშორისო პარტნიორებთან თანამშრომლობით, სკოლის დირექტორის განახლებული სტანდარტი მომზადდა, რომელიც მიმართულია სკოლის დირექტორის, როგორც საგანმანათლებლო ლიდერის ფუნქციების გაძლიერებაზე.
დირექტორობის სერტიფიცირება აუცილებელია იმისთვის, რომ მსურველმა მონაწილეობა მიიღოს დირექტორობის კონკურსში. იმ საჯარო სკოლებში, სადაც არ არის არჩეული დირექტორი, სამინისტრომ სამეურვეო საბჭოს ასარჩევად სერტიფიცირებული კანდიდატები უნდა წარუდგინოს.
ბოლო მონაცემებით, საქართველოს საჯარო სკოლების უმრავლესობას დღეს მოვალეობის შემსრულებელი დირექტორი ჰყავს და არა არჩეული.
