მთავარი,სიახლეები

ყირიმის ხიდის დაზიანების გამო რუსეთს სერიოზული პრობლემა აქვს – ბრიტანეთის დაზვერვა

17.10.2022 • 975
ყირიმის ხიდის დაზიანების გამო რუსეთს სერიოზული პრობლემა აქვს – ბრიტანეთის დაზვერვა

დიდი ბრიტანეთის დაზვერვის ინფორმაციით, ლოგისტიკური პრობლემები, რომლებსაც რუსეთის არმია უკრაინის სამხრეთში აწყდებოდა, 8 ოქტომბერს ქერჩის ხიდის დაზიანების შემდეგ კიდევ უფრო გაღრმავდა.

უწყება აღნიშნავს, რომ შეკეთების სამუშაოები ჯერ კიდევ გრძელდება, ყირიმის ხიდი მხოლოდ ნაწილობრივაა ღია და იქ სატვირთო მანქანების უზარმაზარი რიგები დგება.

„უკრაინის სამხრეთში მყოფი რუსეთის ძალები მატერიალურ ტექნიკური მარაგების შევსებას მარიუპოლის გავლით ცდილობენ და ცდილობენ, ასე ამოავსონ ყირიმის ხიდის დაზიანებით გამოწვეული დანაკლისი,“ – წერს დიდი ბრიტანეთის დაზვერვა 17 ოქტომბრის რელიზში.  

უწყების შეფასებით, იმ პირობებში, როდესაც ხერსონში მყოფი რუსული ძალები კონტრშეტევის მოლოდინში არიან, ხოლო ყირიმიდან მომარაგების გზები შეზღუდულია, რუსეთისთვის განსაკუთრებულ მნიშვნელობას იძენს სახმელეთო კავშირი ზაპოროჟიეს ოლქის გავლით და ქალაქი მელიტოპოლი, რომელიც ლოგისტიკურ კვანძად და რუსული ავიაციის ბაზად იქცა.

კრემლისტური მედიის ინფორმაციით, 8 ოქტომბერს, დილით, ყირიმის ხიდზე სატვირთო მანქანა აფეთქდა, რის შემდეგაც ხანძარი გაუჩნდა მიმავალ მატარებელში საწვავით სავსე შვიდ ცისტერნას. ნაწილობრივ ჩამოიშალა ორი საავტომობილო მონაკვეთი და დაიღუპა ოთხი ადამიანი.

12 ოქტომბერს რუსეთის ФСБ-მ განაცხადა, რომ ყირიმის ხიდის აფეთქების საქმეზე 8 ადამიანი დააკავეს – 5 რუსეთის მოქალაქე, 3 – უკრაინისა და სომხეთის, „ტერაქტის“ ორგანიზატორად კი უკრაინის სამხედრო დაზვერვის უფროსი კირილო ბუდანოვი დაასახელა.

რუსული სპეცსამსახურების ცნობით, ასაფეთქებელი ნივთიერების გადატანის პროცესში საქართველოს ორი მოქალაქეც იყო ჩართული. მათივე მტკიცებით, ტვირთმა ყირიმში შესვლამდე ფოთის პორტიც გაიარა.

გადაბეჭდვის წესი


ასევე: