უკრაინის საჰაერო ძალების ინფორმაციით, დღეს დილით რუსების სულ მცირე 4 სამხედრო ვერტმფრენი ჩამოაგდეს.
„12 ოქტომბერს, 8:40 საათიდან 8:58 საათამდე პერიოდში, უკრაინის სამხრეთში საჰაერო ძალების დანაყოფებმა საზენიტო რაკეტებით გაანადგურეს მოწინააღმდეგის სულ მცირე 4 სამხედრო ვერტმფრენი (სავარაუდოდ Ka-52), რომლებიც სამხრეთის მიმართულებაზე მყოფ საოკუპაციო ძალებს ჰაერიდან ეხმარებოდნენ“, – ნათქვამია საჰაერო ძალების პრესსამსახურის რელიზში.
წინასწარი ინფორმაციით, ერთ-ერთი ვერტმფრენი გათავისუფლებულ ტერიტორიაზე ჩამოვარდა, დანარჩენი კი – ფრონტის ხაზს მიღმა.
უკრაინის საჰაერო ძალების პრესსამსახური დასძენს, რომ უკრაინის დანაყოფებმა ესროლეს კიდევ ორ ვერტმფრენს და არსებობს ალბათობა, რომ ისინიც განადგურებულია, თუმცა ეს ინფორმაცია ჯერ არ დადასტურებულა.
უკრაინული მედიის ცნობით, 12 ოქტომბრის დილას უკრაინის ჰაერსაწინააღმდეგო თავდაცვის სისტემამ ნიკოლაევის ოლქში 9 კამიკაძე-დრონი „შაჰედ 136“ ჩამოაგდო.
