უკრაინის შეიარაღებული ძალების კონტრშეტევის დროს, აღმოსავლეთ ფრონტზე, ცოტა ხნის წინ მობილიზებული რუსი ჯარისკაცების დიდი ნაწილი ტყვედ ჩავარდა. ზოგიერთი მათგანი მხოლოდ 12 დღე „იბრძოდა“ – ამის შესახებ უკრაინის უსაფრთხოების სამსახური აცხადებს.
უსაფრთხოების სამსახური აქვეყნებს ვიდეოსაც, რომელშიც ერთ-ერთი ტყვედ ჩავარდნილი პირი აცხადებს, რომ 13 სექტემბერს ჩამოვიდა საომრად და 25 სექტემბერს ტყვედ ჩავარდა. იგი ჰყვება, რომ მისი ოცეული ერთ წუთში დაამარცხეს უკრაინელმა სამხედროებმა.
„ნაწილობრივი მობილიზაცია“ რუსეთში 21 სექტემბერს გამოცხადდა. პუტინის ბრძანებით, ის მხოლოდ რეზერვში მყოფ და სამხედრო გამოცდილების მქონე პირებს ეხებათ. რუსეთის თავდაცვის სამინისტროს ცნობით, დაგეგმილია 300 000 კაცის გაწვევა.
„ნაწილობრივი მობილიზაციის“ გამოცხადებიდან ორ კვირაში რუსეთი 700 000-მა ადამიანმა დატოვა, მათგან 200 000 ყაზახეთში გადავიდა.
რუსეთში მობილიზებული პირების ნაწილი აცხადებს, რომ ისინი არ არიან სათანადოდ აღჭურვილი და მობილიზაციის პროცესი დარღვევებით მიმდინარეობს.
რამდენიმე დღის წინ დაახლოებით 500-მა რუსმა სამხედრომ, რომლებიც „ნაწილობრივი მობილიზაციის“ ფარგლებში გაიწვიეს, ჩაწერა ვიდეომიმართვა, რომელშიც ჰყვებიან, რომ მათ არარეგისტრირებული ავტომატები მისცეს და ბელგოროდის ოლქში მიატოვეს.
___________
ფოტოზე: რუსეთ-უკრაინის ომი. ფოტო: EPA-EFE/SERGEY KOZLOV
ამავე თემაზე:
იარაღი მოგვცეს და მიგვატოვეს, საჭმელს ჩვენ ვყიდულობთ – 500-მდე მობილიზებული რუსი
