Batumelebi | ფესტივალი „აღდგომიდან ამაღლებამდე“ ბათუმში ივნისში ჩატარდება ფესტივალი „აღდგომიდან ამაღლებამდე“ ბათუმში ივნისში ჩატარდება – Batumelebi
RU | GE  

ფესტივალი „აღდგომიდან ამაღლებამდე“ ბათუმში ივნისში ჩატარდება

ფესტივალის – „აღდგომიდან ამაღლებამდე“ ბათუმში ორგანიზებისთვის აჭარის განათლების, კულტურისა და სპორტის სამინისტრო საკუთარი ბიუჯეტიდან წელს 8 399 ლარს დახარჯავს. სწორედ ეს თანხა დაასახელა მომსახურების გაწევის სანაცვლოდ, სამინისტროს ელექტრონულ ტენდერში შპს „კრეატივ-ჯგუფმა“. სატენდერო დოკუმენტაციის მიხედვით ფესტივალი ბათუმში 8-9 ივნისს ჩატარდება.

განათლების, კულტურისა და სპორტის სამინისტრომ „კრეატივ-ჯგუფს“ ხელშეკრულების გაფორმება უკვე შესთავაზა. სამინისტროს მიერ გამოცხადებულ შესაბამის ტენდერში მონაწილეობა მხოლოდ ამ კომპანიამ მიიღო [კომპანია გასული წლის თებერვალშია რეგისტრირებული].

კომპანიის მიერ სამინისტროსთვის მისაწოდებელ მომსახურებაში უნდა შევიდეს:

სასტუმროს მომსახურება (სამჯერადი კვებით) ქალაქ ბათუმში (7 პირი) 7-10 ივნისი;  მონაწილეთა ტრანსპორტირება მიკროავტობუსით არანაკლებ 18 ადგილიანი (თბილისი-ბათუმი-თბილისი, ასევე ბათუმში შიდა მომსახურეობა); მონაწილეთა გზაში კვება (ორჯერ, 7 და 10 ივნისს) (ზესტაფონი ან ქუთაისი), აღნიშნულის შეუძლებლობის შემთხვევაში მიმწოდებელი ვალდებულია, თითოეულ პირს წინასწარ გადასცეს ყოველ დღეზე 15-15 ლარი;

საზეიმო ვახშამი ფესტივალის დახურვის შემდეგ (20 პირი) 9 ივნისი. სავარაუდო მენიუ: ცივი კერძები – 2 სახეობის; ცხელი კერძები – 9 სახეობის; სალათები – 2 სახეობის; მჟავე ასორტი – 1; გამაგრილებელი სასმელები – 3 სახეობის; პური, მჭადი, ხაჭაპური, ღვინო;

მომსახურებაში ასევე შედის – ბროშურების, პროგრამების, ბილეთების/მოსაწვევების ბეჭდვა (1000 ცალი), აფიშები, სცენის გაფორმება ყვავილებით (გირლიანდი 15 მეტრი); თაიგულები მონაწილეთათვის 2 ცალი (არანაკლებ 8 ვარდი თითოეულ თაიგულში); ფოტო-გადაღება და სხვ.

საერთაშორისო მუსიკალური ფესტივალი – „აღდგომიდან ამაღლებამდე“ 2006 წელს სრულიად საქართველოს კათოლიკოს-პატრიარქის საერთაშორისო საქველმოქმედო ფონდისა და აკაკი რამიშვილის ფონდის „ტრადიცია და ინოვაცია“-ს მიერ დაფუძნდა და დედაქალაქსა და რეგიონებში იმართება.

წელს, ფესტივალი თბილისის ისტორიის მუზეუმ „ქარვასლაში“ საქართველოს და დაღესტნის სახალხო მხატვრის, თბილისის საპატიო მოქალაქის, ხელოვან მანანა მაგომედოვას ფოტონამუშევრების გამოფენით გაიხსნება.

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com