ბათუმში, ლერმონტოვისა და ჭავჭავაძის ქუჩების კვეთაში, „ბათუმი ტექსტილის“ შენობის დიდი ნაწილი უკვე დაანგრიეს. შპს „მერმისი კაპიტალი“ აქ მრავალფუნქციური ობიექტის მშენებლობას გეგმავს.
სამშენებლო ნებართვის მიხედვით, კომპანიის ნაკვეთი ერთ ჰექტარზე მეტ ტერიტორიას მოიცავს.
ბათუმი, ჭავჭავაძის ქუჩა
ბათუმი, ლერმონტოვისა და ჭავჭავაძის ქუჩების კვეთა # 34/119
საჯარო რეესტრის მონაცემების თანახმად, მიწის ნაკვეთი თავისი შენობებით ყოფილმა მფლობელმა, ბათუმის „სამკერვალო საწარმოო გაერთიანებამ“ შპს „მერმისი კაპიტალს“ 2021 წლის იანვარში მიჰყიდა.
მონიშნულია კომპანიის საკუთრებაში არსებული ტერიტორია
ეს ქონება 2006 წელს, წინა მთავრობის დროს, ვალდებულების შესრულების პირობით გაასხვისეს, ერთ-ერთი ვალდებულება აქ საწარმოს ამოქმედება და მოქალაქეების დასაქმება იყო კონკრეტული ვადით. დიდი ალბათობით, ეს ვადა უკვე გავიდა და შეთანხმების შესაბამისად ქონება კომპანიის საკუთრებაში გადავიდა, რომელმაც ის შპს „მერმისი კაპიტალს“ მიჰყიდა.
სამშენებლო ტერიტორია ერთ ჰექტარზე მეტია [16 019კვ.მ]. საჯარო რეესტრის მონაცემებით, სამკერვალო საწარმო სულ რვა შენობას აერთიანებდა, მათი დიდი ნაწილი უკვე დაანგრიეს, დაწყებულია ახალი შენობების მშენებლობაც.
მიუხედავად იმისა, რომ უკვე თვეზე მეტია ნგრევის პროცესთან ერთად სამშენებლო პროცესიც მიმდინარეობს, სამშენებლო მოედანზე არ არის გამოკრული საინფორმაციო დაფა, აქ დაგხვდა მხოლოდ ნებართვის გაცემასთან დაკავშირებული ბრძანების ქსეროასლი.
მერის ბრძანების მიხედვით, რომელიც ადგილზეა გამოკრული, აქ მრავალფუნქციური ობიექტის მშენებლობა იგეგმება, სადაც იქნება კომერციული და საოფისე ფართობები, სპორტულ-გამაჯანსაღებელი ცენტრი და საზოგადოებრივი კვების ობიექტები. დოკუმენტების მიხედვით, შენობებს, რომელთა კონსტრუქციაც მდგრადია, კომპანია შეინარჩუნებს და რეკონსტრუქციას ჩაუტარებს, ნაწილი კი უკვე დაანგრიეს.
შპს „მერმისი კაპიტალი“ კვიპროსის ოფშორულ ზონაში დაფუძნებულ კომპანია „ლამაჩო ლიმიტედს“ ეკუთვნის, კომპანიის დირექტორი მალხაზ მგელაძეა.
