უკრაინაში კომპენსაციის თანხა გაიზრდება მათთვის, ვინც იძულებით გადაადგილებული პირები საკუთარ სახლებში ნებაყოფლობით, უფასოდ შეიფარა.
ცვლილება პირველი ოქტომბრიდან შევა ძალაში.
ბინების მეპატრონეები, რომლებმაც უსასყიდლოდ შეიფარეს ომის გამო იძულებით გადაადგილებული პირები, სახელმწიფოსგან, თვეში, ერთ ადამიანზე, 450 გრივნის ნაცვლად 950 გრივნას მიიღებენ.
როგორც რეინტეგრაციისა და დროებით ოკუპირებული ტერიტორიების სამინისტრომ განაცხადა, თანხის გაზრდა უკრაინის წითელი ჯვრის საზოგადოებასთან შეთანხმებით მოხერხდა.
„6 სექტემბერს მთავრობამ უკრაინის წითელი ჯვრის საზოგადოებასთან განახლებულ მემორანდუმი გააფორმა. ეს შეთანხმება საშუალებას გვაძლევს, დავაფინანსოთ ფულადი კომპენსაციები იმ ადამიანებისთვის, რომლებმაც იძულებით გადაადგილებულ პირებს თავშესაფარი მისცეს,“ – ნათქვამია სამინისტროს განცხადებაში.
პროგრამა ითვალისწინებს სახელმწიფო კომპენსაციას მათთვის, ვინც დროებით ოკუპირებული ტერიტორიებიდან ან საბრძოლო მოქმედებების ზონებიდან დევნილ მოქალაქეებს საცხოვრებლით უფასოდ ეხმარება.
