5 სექტემბრის მონაცემებით, უკრაინის ბირთვული ობიექტების გარშემო რადიაციული ფონი არ შეცვლილა და ნორმის ფარგლებშია, თუმცა უკრაინის ჰიდრომეტეოროლოგიური ცენტრი აქვეყნებს ახალ პროგნოზს, როგორ გავრცელდება რადიაცია ზაპოროჟიეს ატომურ ელექტროსადგურზე ავარიის შემთხვევაში.
ახალი პროგნოზი ზაესზე პირობითი ავარიის მოდელირების შედეგია, იმ პირობებში, თუკი ავარიის დროს ამინდი ისეთივე იქნება, როგორიც 4 სექტემბერს იყო. ექსპერტების ვარაუდით, რადიაცია ძირითადად სამხრეთისკენ გავრცელდებოდა.
სპეციალისტები მივიდნენ დასკვნამდე, რომ ჰაერის მასები 4 სექტემბერს 15 საათის განმავლობაში წაიღებდნენ რადიაციას ზაპოროჟიესა და ხერსონის ოლქებისა და დროებით ოკუპირებული ყირიმისკენ. ამის შემდეგ, ეს მასები გადაივლიდა შავ ზღვას და რადიაცია მიაღწევდა რუმინეთამდე, მოლდოვამდე, თურქეთამდე, ბულგარეთსა და საბერძნეთამდე.
როგორი იქნებოდა ვითარება სხვა ბირთვულ სადგურებზე ავარიის შემთხვევაში:
თუ 4 სექტემბერს ავარია მოხდებოდა სამხრეთ უკრაინის ატომურ ელექტროსადგურზე, ჰაერის მასები რადიაციას წაიღებდა სამხრეთ-დასავლეთით და დაფარავდა ნიკოლაევისა და ოდესის ოლქების, ასევე მოლდოვის ტერიტორიას. 17 საათის შემდეგ რადიაცია ყირიმისკენ და შავი ზღვისკენ შეიცვლიდა მიმართულებას.
როვნოს ატომურ სადგურზე ავარიის შემთხვევაში რადიაცია სამხრეთისკენ გაიფრქვეოდა და ძირითადად დასავლეთის ოლქებს დაფარავდა, რამდენიმე საათის შემდეგ კი მიაღწევდა უნგრეთს, სლოვაკეთსა და პოლონეთს.
თუ ავარია ხმელნიცკის ატომურ ელექტროსადგურზე მოხდებოდა, ჰაერის მასები რადიაციას ხმელნიცკის, ჟიტომირის, როვნოს და ვოლინის ოლქებისკენ წაიღებდა. საბოლოოდ, რადიაცია მოხვდებოდა მოლდოვის, რუმინეთის, უნგრეთის, სლოვაკეთისა და პოლონეთის ტერიტორიებზე.
უკრაინის ჰიდრომეტცენტრში აღნიშნავენ, რომ რადიაციული ვითარება უკრაინის ატომური ელექტროსადგურების გარშემო სტაბილურია, მათ შორის ზაპოროჟიეს სადგურთანაც, რომელიც სროლების გამო, ამ თვეში უკვე მეორედ გაითიშა საერთო ენერგოქსელიდან.
