უკრაინამ რუსეთის ტყვეობიდან დაახლოებით 600 ადამიანი დაიბრუნა, მათ შორის, 53 ბავშვია – დაბრუნებულების უმეტესობა უკრაინის დამცველია.
ტყვეობიდან გამოხსნილთა მონაცემები ნაციონალური საინფორმაციო ბიუროს ხელმძღვანელმა ოლექსანდრ სმირნოვმა გაასაჯაროვა. მისი თქმით, დღევანდელი მდგომარეობით, ტყვეობიდან გათავისუფლებული 600 ადამიანიდან 100 სამოქალაქო პირია, 500 კი – სამხედრო.
„რაც შეეხება დეპორტირებულებს, ერთი მხრივ, რიცხვები შემაშფოთებელია, თუმცა მეორე მხრივ, ზუსტი მონაცემები არ არსებობს, რადგან ჩვენ არ გვაქვს აგრესორის ტერიტორიაზე წვდომა. არსებობს მხოლოდ ის რიცხვი, რომელსაც თავად აგრესორი სახელმწიფო ასახელებს – 3 მილიონზე მეტი იძულებით დეპორტირებული ადამიანი, მათ შორის 600 000 ბავშვი,“ – აღნიშნავს სმირნოვი.
უკრაინის ტერიტორიაზე ადამიანების დაბრუნება, მისი თქმით, ურთულესი პროცესია.
ტყვეების ერთ-ერთი უკანასკნელი გაცვლა რუსეთსა და უკრაინას შორის 2 სექტემბერს შედგა და უკრაინამ 14 სამხედრო დაიბრუნა, მათ შორის 58-ე ცალკეული მექანიზირებული ბრიგადიდან 10, ხოლო 30-ე ბრიგადიდან – 4.
ტყვეები ქვეყნებმა დონეცკის ოლქში გაცვალეს.
6 სექტემბერს უკრაინამ 25 დაღუპული სამხედროს ცხედარი დაიბრუნა, ხოლო ივლისში – 45. უკრაინული მედიის ცნობით, რუსეთთან გაცვლის ფარგლებში, სამშობლოში უკვე უკრაინის 400 დაღუპული დამცველი ჩამოასვენეს. მათი უმრავლესობა „აზოვსტალიდანაა“ და ისინი უკვე ამოცნობილნი არიან.
ერთ-ერთი ყველაზე მსხვილი გაცვლა უკრაინასა და რუსეთს შორის ივნისის ბოლოს შედგა და მაშინ უკრაინაში 144 ტყვე ჯარისკაცი დაბრუნდა, მათ შორის, 95 „აზოვსტალის“ მცველი.
