Batumelebi | ბათუმში თევზჰაკათონი 2016 იწყება ბათუმში თევზჰაკათონი 2016 იწყება – Batumelebi
RU | GE  

ბათუმში თევზჰაკათონი 2016 იწყება

დღეს, დედამიწის დღეზე, ბათუმის ამერიკულ კუთხეში აშშ-ის სახელმწიფო დეპარტამენტის მესამე ყოველწლიური თევზჰაკათონი გაიხსნა.

თევზჰაკათონის ფარგლებში, ოცდაათი პროგრამისტი, დიზაინერი და მეცნიერებით გატაცებული ენთუზიასტი უქმეებს ბათუმის ამერიკულ კუთხეში გაატარებს, რათა მეთევზეობის პრობლემის გადასაჭრელად საუკეთესო აპლიკაცია შექმნას.

ბათუმის აქტივობა სახელმწიფო დეპარტამენტის მიერ მთელ მსოფლიოში ორგანიზებული თევზჰაკათონების ნაწილია. ესაა საჯარო და კერძო უწყებების თანამშრომლობის მაგალითი, რომელიც მიზნად ისახავს აშშ-ის მთავრობის კერძო სექტორსა და სამოქალაქო საზოგადოებასთან შეკავშირებას. შეჯიბრს მსაჯთა გუნდი შეაფასებს. გამარჯვებულსა და მეორეადგილოსანს ჯილდოები გადაეცემათ. პროექტის პარტნიორი, საინფორმაციო ტექნოლოგიების აკადემია STEP, თავის პრიზს ცალკე კატეგორიაში გასცემს.

თევზჰაკათონის დასრულების შემდეგ, მობილური ტექნოლოგიებისა და მეთევზეობის ექსპერტთა გლობალური ჯგუფი გამარჯვებულ აპლიკაციებს შეაფასებს და გრან-პრის მფლობელს გამოავლენს. გამარჯვებული მსოფლიო ოკეანეების დღეს, 8 ივნისს გამოცხადდება. ერთი გუნდი კომპანია „ვირჯინის“დაწესებულ 10,000 ამერიკულ დოლარს მიიღებს. კიდევ ერთი გუნდის აპლიკაციის დახვეწაზე კი აშშ-ის მთავრობის კონტრაქტორი კომპანია იმუშავებს.

 

 

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან