ფინეთი 90 პროცენტით შეამცირებს ვიზების გაცემას რუსეთის მოქალაქეებზე

ფინეთის მთავრობამ მიიღო გადაწყვეტილება, მნიშვნელოვნად შეამციროს რუსეთის მოქალაქეებისთვის გაცემული ტურისტული ვიზების რაოდენობა უკრაინაში მიმდინარე ომის ფონზე.

ამის შესახებ ფინეთის საზოგადოებრივი მაუწყებელი ავრცელებს ინფორმაციას.

მაუწყებლის ცნობით, დღეს, 16 აგვისტოს, ქვეყნის საგარეო საქმეთა მინისტრმა პეკა ჰაავისტომ განაცხადა, რომ ფინეთი შეზღუდავს რუსეთის სავიზო განაცხადების რაოდენობას დაახლოებით 10 პროცენტამდე.

მინისტრის თქმით, ცვლილებები ძალაში სექტემბრის დასაწყისიდან შევა. მან ასევე აღნიშნა, რომ საგარეო საქმეთა სამინისტრო იმუშავებს შინაგან საქმეთა სამინისტროსთან ერთად, რათა შეისწავლოს ჰუმანიტარული ვიზის საკითხი, რამაც შეიძლება ფინეთში გადასვლა გაუადვილოს ჟურნალისტებს, დისიდენტებსა და აქტივისტებს.

ფინეთი ასევე მხარს უჭერს რუსეთთან ევროკავშირის სავიზო რეჟიმის გამარტივების შეთანხმების შეწყვეტას.

მაუწყებლის ცნობით, ფინეთი ახლა დღეში საშუალოდ 1000 სავიზო განაცხადს იღებს რუსეთის მოქალაქეებისგან.