ატომური ენერგიის საერთაშორისო სააგენტოს გენერალური დირექტორი აცხადებს, რომ მზადაა თავად უხელმძღვანელოს მისიას, რომელიც ზაპოროჟიეს ატომური ელექტროსადგურის მდგომარეობას შეისწავლის.
სააგენტოს გენერალურმა დირექტორმა რაფაელ მარიანო გროსიმ თავისი წინადადება 11 აგვისტოს გაეროს უსაფრთხოების საბჭოს სხდომაზე წარადგინა.
მისიის მიზანი იქნება:
- შეფასდეს სადგურისთვის მიყენებული ფიზიკური ზიანი. კერძოდ, რა მდგომარეობაშია უსაფრთხოების ძირითადი და სარეზერვო სისტემები; პერსონალის სამუშაო პირობები.
- გატარდეს სასწრაფო ზომები უსაფრთხოების მისაღწევად; შემოწმდეს რეაქტორებისა და აპარატურის, ბირთვული მასალების, ნედლი და გადამუშავებული საწვავის საცავები.
სააგენტოს გენერალურმა დირექტორმა დასძინა, რომ ანალოგიური მისიისთვის სააგენტო ივნისშიც მზად იყო, თუმცა „პოლიტიკური თუ სხვა ფაქტორების გამო“ ეს ვიზიტი ვერ შედგა.
გროსის თქმით, მოცემულ მომენტში ავარიის გარდაუვალი საფრთხე არ არსებობს, თუმცა ვითარება ნებისმიერ მომენტში შეიძლება შეიცვალოს, ამიტომ სადგურის სიახლოვეს დაუყოვნებლივ უნდა შეწყდეს ყველანაირი საბრძოლო მოქმედება. გარდა ამისა, სპეციალისტები ასეთ პირობებში ვერ იმუშავებენ.
სააგენტოს პირობაა, რომ მისიასთან როგორც უკრაინულმა, ისე რუსულმა მხარემ უნდა ითანამშრომლოს.
თავისი თანხმობა უკრაინამ გაეროშივე გამოთქვა, ელჩმა სერგეი კისილიცამ განაცხადა, რომ უკრაინის ხელისუფლება მზადაა მისია ყველა აუცილებელი პირობით უზრუნველყოს.
რუსეთის არმიამ ევროპის უმსხვილესი ატომური ელექტროსადგური ჯერ კიდევ ომის დასაწყისში, 4 მარტს, დაიკავა, ხოლო მისი თანამშრომლები მძევლებად აიყვანა.
რუსები ზაპოროჟიეს ატომურ ელექტროსადგურს თავიანთი ტექნიკისა და პირადი შემადგენლობის ბაზად იყენებენ, უკრაინის უშიშროება აცხადებს, რომ სამხედროებმა ატომური ობიექტი დანაღმეს.
გასულ კვირაში „ენერგოატომმა“ განაცხადა, რომ რუსებმა სადგურს საარტილერიო ცეცხლი გაუხსნეს, რათა მისი ინფრასტრუქტურა დაეზიანებინათ და ელექტროსადგური უკრაინის საერთო ენერგოსისტემიდან გაეთიშათ.
სპეციალისტების თქმით, ზაპოროჟიეს ატომურ ელექტროსადგურზე ავარიის შემთხვევაში, შედეგები გამანადგურებელი იქნება. უკრაინის ხელისუფლების განცხადებით, რუსებმა სადგურს ცეცხლი 11 აგვისტოსაც გაუხსნეს.
ზაპოროჟიეს ატომური ელექტროსადგური
მთავარი ფოტო: რაფაელ მარიანო გროსი/ატომური ენერგიის საერთაშორისო სააგენტოს ფოტო
