მთავარი,სიახლეები

უკრაინელი პილოტის ბოლო ფრენა – გმირი, რომლის ვერტმფრენიც ოკუპანტებმა ააფეთქეს

11.08.2022 • 6042
უკრაინელი პილოტის ბოლო ფრენა – გმირი, რომლის ვერტმფრენიც ოკუპანტებმა ააფეთქეს

უკრაინის შეიარაღებული ძალების, საზღვაო ფლოტის უფროსი პილოტი, პოლკოვნიკი იგორ ბეძაი 20 ივლისს 50 წლის გახდებოდა.

მისი ვერტმფრენი პროფესიონალური მანევრის წყალობით სასწაულებრივად გაექცა რუსულ გამანადგურებელ სუ-30, რომელმაც ორჯერ გაისროლა ბეძაის ვერტმფრენისკენ. თუმცა უკრაინელი პილოტი ვეღარ გადაურჩა ამავე გამანადგურებლისგან გასროლილ მართვად რაკეტას Р-73.

ეს პოლკოვნიკ ბეძაის ბოლო ფრენა იყო. ბორტზე ხუთი უკრაინელი სამხედრო პირი იმყოფებოდა. ვერტმფრენი რუსმა ოკუპანტებმა ააფეთქეს.

უკრაინის გმირის, იგორ ბეძაის შესახებ ვრცელ მასალას უკრაინის თავდაცვის ძალების საინფორმაციო გამოცემა  Armyinform-ი აქვეყნებს.

  • საბედისწერო 7 მაისი

„შვიდ მაისს, დილის შვიდ საათზე დამირეკა. ჩვეულებრივად ვისაუბრეთ. ცუდი წინათგრძნობა არ მქონია. დამირეკა და მკითხა, როგორ ვიყავით, შვილები როგორ იყვნენ. ხმაზე ეტყობოდა – უძინარი იყო. საუბრისას მესმოდა, როგორ ქროდა ქარი და მივხვდი – აეროდრომზე იყო, თუმცა ამისთვის ყურადღება არ მიმიქცევია.

სატელეფონო საუბრის შემდეგ რამდენიმე საათი გავიდა და სახლთან მანქანა გაჩერდა, ორი გოგო გადმოვიდა. იგორი აღარ არისო, მითხრეს. ძაფივით გაწყდა ჩემი ცხოვრება. ფეხზე ძლივს ვიდექი და ვფიქრობდი, როგორ უნდა მეთქვა ეს ამბავი იგორის დედისთვის“, – იხსენებს პილოტ ბეძაის ცოლი, იულია ბეძაი.

იგორ ბეძაი მეუღლესთან, იულიასთან ერთად

იგორს უახლოესი მეგობარი ჰყავს, სერგეი, ასევე ოფიცერი. მეექვსე კლასიდან მეგობრობდნენ და ერთად გადაწყვიტეს გამხდარიყვნენ პილოტები.

იგორის მეუღლე ქმრის მონათხრობს იხსენებს, რომ მფრინაობისკენ იგორს და მის მეგობარ სერგეის სკოლაში სამხედრო საქმის მასწავლებელმა უბიძგა.

სამხედრო საქმის მასწავლებლის შვილი პილოტი იყო და ბიჭებს ხშირად ესაუბრებოდა სამხედრო ავიაციაზე. იგორი სამხედრო მოიერიშე თვითმფრინავის მართვაზე ოცნებობდა, სერგეის კი ვერტმფრენის პილოტობა უნდოდა.

1989 წლის ზაფხულში სერგეი ხარკოვში საავიაციო საინჟინრო სასწავლებელში ჩაირიცხა. იგორი კი მფრინავების უმაღლესი სამხედრო საავიაციო სკოლის სტუდენტი გახდა. სკოლის მეგობრებმა სამხედრო უნივერსიტეტიც ერთად დაასრულეს 1993 წელს. ამის შემდეგ სერგეიმ მიკოლაევის, იგორმა კი ოჩაკოვოს საზღვაო საავიაციო დანაყოფში დაიწყო მუშაობა.

  • როგორ გადაარჩინა იგორ ბეძაიმ საავიაციო ტექნიკა ყირიმში

2004 წელს იგორ ბეძაი – ნოვოფედოროვკაში, ყირიმში გადაიყვანეს. იგორი ყირიმში ოჯახთან ერთად გადავიდა საცხოვრებლად. რუსი დამპყრობლების მიერ ყირიმის ანექსიის დროს, 2014 წელს, ის უკვე საზღვაო საავიაციო ჯგუფის მეთაური იყო.

„შეურაცხმყოფელი და ამაზრზენი იყო, როცა ვხედავდი, ყირიმში, სამხედრო ნაწილზე აპირებდა თავდასხმას ადგილობრივი მოსახლეობა, მათ შორის ის ხალხი, ვინც სხვა დროს გვიღიმოდა და სამხედრო მფრინავებს პროფესიულ დღესასწაულებსაც კი ულოცავდა.

ვხედავდი ჩემი შვილის, ილიას ინგლისური ენის მასწავლებელი როგორ მოდიოდა საგუშაგოსკენ და ყვიროდა – კმარა, უნდა გავყაროთ ეს ბანდერელებიო“, – იხსენებს იულია ბეძაი, იგორ ბეძაის მეუღლე.

მისი თქმით, იგორს ემუქრებოდნენ და აშინებდნენ, მაგრამ უკიდურესად რთულ მომენტშიც კი ოფიცერს არ დაუკარგავს თავდაჯერებულობა და იუმორის გრძნობა:

„2014 წელსაც ასე იყო, როცა დაურეკეს და აცნობეს, რომ 19 მარტს ავიადაჯგუფება შტურმით აიღებდა დანაყოფს. იგორის პასუხი ზარზე ასეთი იყო – მაინც და მაინც 19 მარტს? შვილის დაბადების დღეა და არ ვისურვებდი დღესასწაულის ჩაშლასო.

ფაქტია, რომ 19 მარტს რაშისტებს არ დაურტყამთ იგორის დანაყოფისთვის. ბლოკპოსტს ოკუპანტები თავიანთ კოლაბორაციონისტებთან ერთად 22 მარტს მიადგნენ.

იგორის ინიციატივით საავიაციო ტექნიკა მიკოლაევის ოლქში ისე გადაანაწილეს, რომ რადიოსალოკაციო აპარატურა გამორთო (მოწინააღმდეგისთვის ტექნიკის ადგილსამყოფელის დამალვის მიზნით).

ისე მყისიერად, უეცრად და ფარულად გააკეთა ეს იგორმა, რომ უკრაინელი სამხედროებიც კი ვეღარ პოულობდნენ ავიატექნიკის ადგილს“, – იხსენებს უკრაინის გმირის ცოლი 2014 წლის ყირიმის ამბებს და აგრძელებს:

„მახსოვს, იგორი ჰყვებოდა, როცა ჩვენი ვერტმფრენები და თვითმფრინავები აფრინდა, 40 წუთის განმავლობაში, ხელები გვქონდა ჩაჭიდებული ერთმანეთისთვის პილოტებს და ვლოცულობდით, რომ ყველაფერი კარგად ყოფილიყოო.

მოგვიანებით, როცა გააცნობიერეს, რომ დავალება წარმატებით დასრულდა, შვებით ამოისუნთქეს.

ყირიმში, იგორის დანაყოფმა 6 აპრილს მიიღო პირველი დარტყმა რუსებისგან: საღამოს, ოფიცერთა საერთო საცხოვრებელში ოკუპანტებმა ცეცხლსასროლი იარაღით, ორი გასროლით მოკლეს შტაბის ოპერატიული განყოფილების უფროსი, მაიორი სტანისლავ კარაჩევსკი.

ასე ტრაგიკულად დასრულდა ჩვენი ათწლიანი ყოფნა ყირიმში. მე და იგორი დავბრუნდით ჩვენს მშობლიურ მიკოლაევში, სადაც ყოველთვის გვინდოდა დაბრუნება, მაგრამ არა ასე“, – იხსენებს იულია ბეძაი.

უკრაინელი იგორ ბეძაის შეუიარაღებელი, თეთრი ვერტმფრენი, საბედისწერო ფრენის დროს სამძებრო-სამაშველო დანიშნულების სამუშაოს ასრულებდა. მას ამ პერიოდში სასწრაფო დახმარების ვერტმფრენადაც იყენებდნენ. ამის მიუხედავად რუსმა პილოტმა, ილია სიზოვმა ვერტმფრენს მაინც ესროლა.

სიზოვს, როგორც თავად გაავრცელა შემდეგ ინტერნეტში ინფორმაცია, რუსეთში გმირის ვარსკვლავი მიანიჭეს.


წყარო: Aryinform

ქვეყნდება შემოკლებით

ფოტოები: უკრაინის თავდაცვის ძალები

გადაბეჭდვის წესი


ასევე: