ნეტგაზეთი • RU

რა დაადგინა CNN-მა ოლენოვკაში უკრაინელი სამხედრო ტყვეების მკვლელობაზე

ოლენოვკაში მომხდარ თავდასხმაზე, რომლის დროსაც 50-ზე მეტი უკრაინელი სამხედრო ტყვე დაიღუპა, CNN სპეციალურ რეპორტაჟს აქვეყნებს. რეპორტაჟის თანახმად, სიცრუეა რუსეთის ვერსია, თითქოს კოლონიას უკრაინამ „ჰაიმარსით“ დაარტყა.

ჟურნალისტური გამოძიება, რომელიც დაფუძნებულია ადგილზე გადაღებული ფოტოებისა და ვიდეოების, ასევე აფეთქებამდე და მის შემდეგ გადაღებული სატელიტური ფოტოების ანალიზზე, სასამართლო-სამედიცინო ექსპერტებისა და შეიარაღების ექსპერტების მოსაზრებებზე, მივიდა დასკვნამდე, რომ მომხდარის რუსული ვერსია, დიდი ალბათობით, გამოგონილია.

პრაქტიკულად გამორიცხულია, რომ შენობას, რომელშიც ტყვეები იმყოფებოდნენ, ზიანი „ჰაიმარსის“ რაკეტისგან მიადგა.

ექსპერტები, რომლებთან კონსულტაციაც CNN-მა გაიარა, დარწმუნებული არიან, რომ ოლენოვკაზე თავდასხმა „ჰაიმარსით“ არ მომხდარა, თუმცა მათ არ შეუძლიათ იმის თქმა, რამ მოკლა და დაჭრა სამხედრო ტყვეები.

 „ადგილზე შესვლის აკრძალვა შეუძლებელს ხდის საბოლოო დასკვნების გაკეთებას, თუმცა ექსპერტების თქმით, ვიზუალური მასალები ძლიერ ხანძარზე მიუთითებს,“ – წერს CNN.

“ჰაიმარსის” რაკეტის ნარჩენები/ფოტო: “ზვევზდა”

„29 ივლისის დილით, ანდრეი ლაზარევმა, რომელიც რუსეთის თავდაცვის სამინისტროს არხზე „ზვეზდაზე“ მუშაობს, აჩვენა აკურატულად დაწყობილი ფრაგმენტები, რომელთაგანაც ერთ-ერთზე „ჰაიმარსის“ რაკეტის სერიული ნომერი ჩანდა, ხანძრის მიუხედავად შესანიშნავ მდგომარეობაში. რუსეთის თავდაცვის პრესსპიკერმა იგორ კონაშენკოვმა განაცხადა, რომ იზოლატორს „ამერიკული „ჰაიმარსით“ დაარტყეს“. თუმცა სატელიტური ფოტოები ადასტურებს, რომ „ჰაიმარსით“ დარტყმა ორმოებს და სერიოზული დაზიანების კვალს ტოვებს, რაც ამ შემთხვევაში არ მომხდარა,“ – მიუთითებს CNN.

ჟურნალისტებმა გააანალიზეს ტრაგედიის შემდგომი ფოტოები, რომლებზეც ჩანს, რომ შენობის კედლები და სახურავის დიდი ნაწილი არ დანგრეულა. როგორც ექსპერტები ამბობენ, „ჰაიმარსით“ დარტყმა ბევრად უფრო თვალსაჩინო ზიანს გამოიწვევდა.

იმის საჩვენებლად, თუ როგორი შეიძლებოდა ყოფილიყო „ჰაიმარსის“ თავდასხმა, ჟურნალისტებმა ერთმანეთს შეადარეს სატელიტური ფოტოები – ერთზე ჩანს „ჰაიმარსის“ რაკეტის კვალი ნოვა კახოვკაში, ხოლო მეორეზე შენობა ოლენოვკაში.

შედარება: მარცხნივ: “ჰაიმარსის” დარტყმის კვალი ნოვა კახოვკაში, მარჯვნივ: შენობა ოლენოვკაში

რამდენიმე ექსპერტი ასევე ეუბნება CNN-ს, რომ ის, რაც ოლენოვკაში გადაღებულ ვიდეოში ჩანს, „ჰაიმარსის“ თავდასხმის შესაძლო შედეგებს არ შეესაბამება.

შეიარაღების ექსპერტი კრის კობ-სმიტი ამბობს, რომ შენობა თხელი კედლებითა და მეტალის სახურავით, „ჰაიმარსის“ დარტყმის შემთხვევაში მთლიანად დაინგრეოდა:

„ამ ვიდეოებზე არსად ჩანს კრატერი. საწოლები არც კი ამოძრავებულა, ბოძები არ დაზიანებულა, თუმცა ჩანს ხანძრით მიყენებული ზიანი. ეს რომ ზალპური ცეცხლის რეაქტიული სისტემის რაკეტა ყოფილიყო, ჩვენ აუცილებლად დავინახავდით კრატერებს, დანგრეულ ჭერსა და კედლებს, აფეთქებულ სხეულებს. აფეთქებით გამოწვეულ შედეგები შენობაზე ან სხეულებზე ფაქტობრივად არ ჩანს. რაც ჩანს, ძლიერი და ინტენსიური ცეცხლით გამოწვეული ზიანია. სახურავის დაზიანებაც, სავარაუდოდ, გამოწვეულია მისი ჩამოშლით და არა აფეთქების შედეგად“.

„ჰაიმარსის“ გამოყენების ალბათობას გამორიცხავენ აშშ-ის ოფიციალური პირებიც.

„ეს ნამდვილად არ იყო „ჰაიმარსი“, – ეუბნება CNN-ს ერთ-ერთი ჩნოვნიკი. მეორე ოფიციალური პირი კი დასძენს, რომ „ცეცხლი, სავარაუდოდ შიგნითვე გაჩნდა“.

სქრინი ვიდეოდან, რომელშიც ჩანს, რომ ჭერი მხოლოდ ნაწილობრივაა დაზიანებული

სამხედრო ტყვეების ნათესავები CNN-ს ეუბნებიან, რომ ოლენოვკაში მყოფებს რაკეტის დარტყმის ხმა არ გაუგიათ.

ანალიტიკოსები განმარტავენ, რომ უკრაინისთვის არანაირი აზრი ექნებოდა შორსმოქმედი რაკეტის გამოყენებას, მაშინ, როდესაც შენობა ფრონტის ხაზიდან სულ რაღაც 15 კილომეტრშია. გარდა ამისა, „ჰაიმარსის“ რაკეტა ძვირადღირებულია და მისი კვალის დადგენაც ძალიან იოლია.

რეპორტაჟში ასევე ნათქვამია, რომ ჟურნალისტებისთვის შეუძლებელი აღმოჩნდა უკრაინელთა იმ ვერსიის გადამოწმებაც, რომლის მიხედვით, კოლონიას რუსებმა თერმობარული იარაღით, „შმელით“ დაარტყეს.

CNN აღნიშნავს, რომ ოლენოვკაში, ყოფილი გამოსასწორებელი კოლონიის ტერიტორიაზე მყოფი 200 სამხედრო ტყვე, მომხდარ ტრაგედიამდე რამდენიმე დღით ადრე ცალკე შენობაში გადაიყვანეს – შენობაში, რომელშიც 28 ივლისის ღამის 11 საათზე ძლიერი ხანძარი გაჩნდა.

როგორც ორი უკრაინელი ჩინოვნიკი CNN-ს ეუბნება, ოლენოვკაში თავდასხმა ზუსტად მაშინ მოხდა, როდესაც უკრაინული მხარე ტყვეების გაცვლას ელოდა.

თავდასხმა ოლენოვკაში, კოლონიის იმ შენობაზე, რომელშიც უკრაინელი სამხედრო ტყვეები, მათ შორის, „აზოველები“ იმყოფებოდნენ, 28 ივლისს, ღამით მოხდა. რუსეთის თავდაცვის სამინისტროს მიერ გამოქვეყნებულ სიაში 50 დაღუპული და 73 დაჭრილია, უკრაინის დაზვერვის მონაცემებით კი თავდასხმისას 130-მდე უკრაინელი ტყვე დაიჭრა.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.