რადიაციულ ქარს ვერავინ შეაჩერებს, მაგრამ კრემლის შეჩერება შესაძლებელია – ზელენსკი

„რუსეთი უკრაინაში იქცევა როგორც ბირთვული ტერორისტი. კატასტროფის შემთხვევაში რადიაციის გავრცელებას ვერავინ შეუშლის ხელს, მაგრამ მოსკოვის შეჩერება შესაძლებელია“ – განაცხადა უკრაინის პრეზიდენტმა, ვოლოდიმირ ზელენსკიმ უკრაინის მოკავშირე ჩრდილოეთ ევროპის ქვეყნების კონფერენციაზე.

ინფორმაციას ამის შესახებ უკრაინული „24 კანალი“ ავრცელებს.

ზელენსკის თქმით, რუსეთს მძევლად ჰყავს აყვანილი ზაპოროჟიეს ატომური ელექტროსადგური და ყველას აშანტაჟებს მოსალოდნელი კატასტროფით.

„საფრთხე ძალიან დიდია, რადგან რუსეთს შეუძლია ისტორიაში ყველაზე დიდი რადიაციული კატასტროფის პროვოცირება. ავარია ზაპოროჟიეს ატომურ ელექტროსადგურზე შესაძლოა ჩერნობილზე უარესიც კი იყოს“ – განაცხადა ზელენსკიმ. მისი თქმით, ავარიის შემთხვევაში ეს რეალურად იქნება რუსეთის მიერ ბირთვული იარაღის გამოყენება ბირთვული დარტყმის გარეშე.

„ვერც ერთი ჩვენგანი ვერ შეაჩერებს რადიაციულ ქარს, მაგრამ ერთად შეგვიძლია შევაჩეროთ ტერორისტული სახელმწიფო,“ – თქვა ზელენსკიმ.

რუსეთის არმიამ ზაპოროჟიეს ატომური ელექტროსადგური ჯერ კიდევ ომის დასაწყისში, 4 მარტს, დაიკავა, ხოლო მისი თანამშრომლები მძევლებად აიყვანა.

8 აგვისტოს უკრაინის სახელმწიფო კომპანია „ენერგოატომმა“ გაავრცელა განცხადება, რომლის თანახმადაც ოკუპანტები ღიად იმუქრებიან ბირთვული ტერორიზმით და აცხადებენ, რომ თუ უკან დახევა მოუწევთ, მზად არიან ზაპოროჟიეს დანაღმული ელექტროსადგური ააფეთქონ.

ამავე თემაზე: 

რუსები მზად არიან ზაპოროჟიეს ატომური სადგური ააფეთქონ – ენერგოატომი