რუსები ღიად იმუქრებიან ბირთვული ტერორიზმით და აცხადებენ, რომ თუ უკან დახევა მოუწევთ, მზად არიან ზაპოროჟიეს დანაღმული ელექტროსადგური ააფეთქონ – ინფორმაციას უკრაინის სახელმწიფო კომპანია „ენერგოატომი“ ავრცელებს.
თავის ტელეგრამარხზე კომპანია რუსეთის რადიოაქტიური, ქიმიური და ბიოლოგიური თავდაცვის ძალების მეთაურის, გენერალ-მაიორ ვალერი ვასილიევის სიტყვებს აქვეყნებს. ზაპოროჟიეს ატომური ელექტროსადგურის გარნიზონს ახლა სწორედ ვასილიევი ხელმძღვანელობს.
მისი თქმით, „აქ იქნება ან რუსული მიწა, ან გადამწვარი უდაბნო“.
„როგორც იცით, ჩვენ დავნაღმეთ ზაპოროჟიეს ატომური სადგურის მნიშვნელოვანი ობიექტები. ამას არც ვმალავთ. ჩვენ მტერი გავაფრთხილეთ. მტერმა იცის, რომ ეს სადგური ან რუსეთის იქნება, ან არავისი. ჩვენ ამ ნაბიჯის შედეგებისთვისაც მზად ვართ და უნდა გესმოდეთ, რომ ჩვენ სხვა გზა არ გვაქვს. თუ იქნება ყველაზე სასტიკი ბრძანება – ჩვენ მას ღირსეულად შევასრულებთ!“ – ვასილიევის ამ ციტატას აქვეყნებს „ენერგოატომი.“
მანამდე უკრაინის სამხედრო დაზვერვამ დაადასტურა, რომ რუსებმა ატომური ობიექტი დანაღმეს.
რუსეთის არმიამ ევროპის უმსხვილესი ატომური ელექტროსადგური ჯერ კიდევ ომის დასაწყისში, 4 მარტს, დაიკავა, ხოლო მისი თანამშრომლები მძევლებად აიყვანა.
რუსები ზაპოროჟიეს ატომურ ელექტროსადგურს თავიანთი ტექნიკისა და პირადი შემადგენლობის ბაზად იყენებენ, რადგან იციან, რომ უკრაინის შეიარაღებული ძალები სადგურზე იერიშს ვერ მიიტანენ.
რამდენიმე დღის წინ „ენერგოატომმა“ განაცხადა, რომ რუსებმა სადგურს საარტილერიო ცეცხლი გაუხსნეს, რათა მისი ინფრასტრუქტურა დაეზიანებინათ და ელექტროსადგური უკრაინის საერთო ენერგოსისტემიდან გაეთიშათ.
მთავარი ფოტო: „ენერგოატომის“ ტელეგრამარხიდან
