უკრაინის პრეზიდენტის საიტზე გამოქვეყნებულმა პეტიციამ, რომლითაც მომდევნო 50 წლის განმავლობაში რუსეთის მოქალაქეებისთვის უკრაინაში შესვლაზე აკრძალვის დაწესებას ითხოვენ, 26 224 ხმა მოაგროვა. იმისთვის, რომ პეტიცია ვოლოდიმირ ზელენსკიმ განიხილოს, მას 25 000 ხმა სჭირდება. პრეზიდენტის საიტზე, დოკუმენტის სტატუსში მითითებულია, რომ ის „განხილვას ელოდება“.
„უკრაინა უკვე 8 წელია იტანჯება ომით, რომელიც ჩვენი ქვეყნის ტერიტორიაზე რუსეთმა გააჩაღა. სამწუხაროდ, ამ 8 წლის განმავლობაში ხელისუფლებამ ვერ შეძლო უკრაინის დაცვა დივერსანტებისა და აგენტებისგან, რომლებიც რუსეთთან უვიზო რეჟიმის გამო თავისუფლად შემოდიოდნენ უკრაინაში. ჩვენ ამის საფასური ათასობით სიცოცხლით გადავიხადეთ. უსაფრთხოებიდან გამომდინარე, გთავაზობთ, შევუზღუდოთ უკრაინაში შემოსვლა ყველა რუსს მომდევნო 50 წლის განმავლობაში და ასევე, არ მივცეთ ცხოვრების უფლება იმათ გარდა, ვინც უკრაინის მხარეს იბრძოდა რუსეთ-უკრაინის ომში,“ – ნათქვამია პეტიციაში, რომელიც 23 მაისს შეიქმნა, ხმის მიცემა კი 7 აგვისტოს დასრულდა.
რუსეთთან სავიზო რეჟიმი უკრაინამ პირველი ივლისიდან დააწესა. მინისტრთა კაბინეტმა შესაბამისი გადაწყვეტილება 17 ივნისს მიიღო.
3 აგვისტოს რუსეთისა და ბელარუსის მოქალაქეებისთვის სავიზო რეჟიმის დაწესება მოითხოვეს საქართველოშიც. Manifest.ge-ზე გამოქვეყნებული პეტიციის მოთხოვნაა, „დაწესდეს რუსეთისა და ბელარუსის მოქალაქეთათვის სავიზო რეჟიმი, რომლის მიხედვითაც წლის განმავლობაში ისინი 3 თვეზე მეტი დროით ვერ შეძლებენ საქართველოს ტერიტორიაზე ყოფნას, რაც უზრუნველყოფს რუსეთისა და ბელარუსის მოქალაქეების მხოლოდ ტურისტული მიზნებისთვის საქართველოში მოგზაურობას“.
პეტიციამ უკვე მოაგროვა 10 000 ხმა. მისი ადრესატები საქართველოს მთავრობა, პარლამენტი და პრეზიდენტი არიან.
საქართველომ რუსეთთან სავიზო რეჟიმი 2012 წელს ცალმხრივად გააუქმა.
