ნეტგაზეთი • RU

რუსეთში მოხალისეთა 40 დანაყოფი შექმნეს, „ვაგნერმა“ ციხეებიდან 1 500 პატიმარი გამოიყვანა

უკრაინასთან ომისთვის რუსეთის 20 რეგიონში უკვე „მოხალისეთა“ 40 ქვედანაყოფი შექმნეს. მსურველთა მიღება რაზმებში, მთელი ქვეყნის მასშტაბით, გაზაფხულიდან დაიწყო.

„ინფორმაცია ამ ქვედანაყოფების შესახებ ქვეყნდება მედიაში, ხელისუფლების ორგანოების სოციალური მედიის გვერდებზე. თითოეულ რაზმს გეოგრაფიული მდებარეობის მიხედვით, თავისი სახელი აქვს. როგორც წესი, ამ ქვედანაყოფებში შედიან უშუალოდ იმ რეგიონის მცხოვრებლები, სადაც ეს დანაყოფი იქნება. ახალწვეულები ერთად გადიან წვრთნებს, შემდეგ კი მათ სპეციალურ სამხედრო ოპერაციაში რთავენ,“ – წერს გამოცემა „კომერსანტი,“ რომელიც რუსეთის რეგიონებში „მოხალისეთა“ ბატალიონების შესახებ სტატიას აქვეყნებს.

გამოცემის ცნობით, ზოგიერთ რეგიონში ერთი დანაყოფი იქნება, ზოგიერთში კი – ორი, სამი ან მეტი.

„მოხალისეებს“ რუსეთის თავდაცვის უწყება უფორმებს ხელშეკრულებას, რომელშიც სამსახურის მინიმალურ ვადად რამდენიმე თვეა მითითებული. კონტრაქტში ასევე აღნიშნულია, რომ შესაძლებელია მისი გაგრძელებაც.

როგორც „კომერსანტს“ ფედერალური ჩინოვნიკი უყვება, საკონტრაქტო დანაყოფები ტერიტორიული ნიშნით იქმნება, რადგან „მოხალისეებთან“ მუშაობა ასე უფრო მოსახერხებელია.

დაპირებული ხელფასი ომში მონაწილეობისთვის კონკრეტულ რეგიონზეა დამოკიდებული და დაახლოებით 130-დან 300 ათას რუბლამდე მერყეობს ( 2000 – 5 000 დოლარი). რეგიონული ხელისუფლებები, თავის მხრივ, ამ ხელფასს ერთჯერად თანხასაც ამატებენ.

„კომერსანტის“ ცნობით, „მოხალისეთა“ რაზმში მსურველების მიღება 4 აგვისტოს დაიწყო სანქტ-პეტერბურგში, მანამდე კი მსგავსი დანაყოფები შეიქმნა იაკუტიაში, პრიმორიეს მხარეში, თათრეთში, ბაშკირეთსა და რუსეთის თითქმის ყველა ოლქში.

დანაყოფებში „მოხალისეთა“ რაოდენობა განსხვავებულია, მაგალითად, პერმის მხარეში შექმნილ მოტომსროლელთა ასეულში 90 კაცია, სატანკო ბატალიონში კი – 160. 400-500 ადამიანისგან შედგება ამურის ოლქის ბატალიონი, ჩელიაბინსკის დანაყოფში 261 ახალწვეულია, ხოლო „იუჟნი ურალში“ – 253.

„კომერსანტი“ აღნიშნავს, რომ სახელობითი დანაყოფები ადგილობრივებისგან ჯერ კიდევ უკრაინის მოვლენებამდე შეიქმნა ჩეჩნეთში და ისინი „სპეციალურ სამხედრო ოპერაციაში“ მონაწილეობენ მისი დაწყების პირველი დღიდან – „ახმადი“, „იუგი“ და ახმად-ხაჯი კადიროვის სახელობის 141-ე მოტორიზებული პოლკი. ივნისის ბოლოს ჩეჩნეთის მეთაურმა რამზან კადიროვმა კიდევ ოთხი ახალი ბატალიონის შექმნის შესახებ გამოაცხადა: „სევერ-ახმადი“ „იუგ-ახმადი“ „ზაპად-ახმადი“ და „ვოსტოკ-ახმადი“. კადიროვის თქმით, ისინიც უკრაინასთან ომში ჩაებმებიან.

გამოცემა Verstka-media-ს ცნობით, რუსეთის 17 რეგიონის კოლონიებიდან „ვაგნერმა“ უკრაინასთან ომში გასაგზავნად სულ მცირე 1 500 პატიმარი გამოიყვანა. მათ, ვინც ომში წასვლაზე უარს ამბობს, გამოცემის ინფორმაციით, დასასჯელად იზოლატორში უშვებენ.

ჟურნალისტების ცნობით, როსტოვის ერთ-ერთ დაწესებულებაში „ვაგნერის“ ახალწვეულები 20 საათის განმავლობაში გადიან მომზადებას. პატიმრებს, რომლებიც უკრაინასთან ომში მონაწილეობას თანხმდებიან, დაახლოებით 200 ათას რუბლს (3 300 დოლარი) ჰპირდებიან. მათ ასევე ჰპირდებიან 300 ათასი რუბლის (5 000 დოლარამდე) გადახდას დაჭრის შემთხვევაში და „სიკვდილის კომპენსაციას“ 5 მილიონი რუბლის (8 200 დოლარი) ოდენობით.

Verstka-media წერს, რომ „ვაგნერი“ პატიმრების გადმოსაბირებლად, ძირითადად, ტულის, იაროსლავსკის, ლენინგრადის, რიაზანის, ნოვგოროდის, სანქტ-პეტერბურგის, არხანგელსკის, კომის რესპუბლიკისა და კარელიის კოლონიებს იყენებდა. საპატიმროებში კი პირადად დადიოდა რუსეთის პრეზიდენტთან დაახლოებული ბიზნესმენი და „ვაგნერის“ დამფუძნებელი ევგენი პრიგოჟინი.

გამომძიებელი ჟურნალისტების ცნობით, პატიმართა პირველი ჯგუფი უკრაინაში, საბრძოლო მოქმედებების ზონაში, 20 ივლისს გაგზავნეს. მათგან უკვე სულ მცირე 5 ადამიანი დაიღუპა, 12 კი ლუგანსკის ჰოსპიტალში მოხვდა.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.