რუსეთის სათათბიროს დეპუტატი ალექსეი ჟურავლევი გერმანელ ჟურნალისტს და, ზოგადად, გერმანელებს პირდაპირ ეთერში დახოცვით დაემუქრა. მან ამის შესახებ პროპაგანდისტულ არხ Russia 1-ის გადაცემის „60 წუთის“ პირდაპირ ეთერში განაცხადა.
ალექსეი ჟურავლევმა, რომელიც რუსეთის ლიბერალურ-დემოკრატიულ პარტიას წარმოადგენს სახელმწიფო დუმაში, განაცხადა, რომ ეს მისი პირადი პოზიციაა.
ჟურავლევის მუქარის შემცველი ჩანაწერი პირდაპირ ეთერში გადაიცა, შემდეგ კი გადაცემის ვებგვერდზე განათავსეს.
დეპუტატის განცხადება მოჰყვა ერთ-ერთ გერმანულ ტელევიზიაში გასულ სიუჟეტს, სადაც იმაზე იყო საუბარი, რომ გერმანიამ უკრაინის არმიას გადასცა Panzerhaubitze 2000 (აჩვენეს, როგორ მუშაობს ეს იარაღი).
ჰაუბიცებისა და იმის შესახებ მომზადებული სიუჟეტის შემდეგ, თუ რა სახის მხარდაჭერას უწევს გერმანია კიევს, რუსმა დეპუტატმა გერმანელ ჟურნალისტსა და პოლიტიკოსებს უწოდა „გებელსის ნაშიერები“, „უღირსი არიელები“, „სტუდიის ვირთხები“ და განაცხადა, რომ ისინი დაკავებულნი არიან „პროპაგანდით“, „ომის წაქეზებით“ და „მუშაობენ მეთოდურად“.
ჟურავლევმა სიუჟეტის ავტორ გერმანელ ჟურნალისტს ასევე უწოდა „ნაციკი“და დაემუქრა, რომ რუსეთი „მივა იქ და ყველას მოკლავს“. მეტიც, მან პირობა დადო, რომ პირადად წავიდოდა ჟურნალისტის მოსაკლავად.
„მინდა, ამ ნაცისტს ვუთხრა: ჩვენ ყველანი მოვალთ და მოგკლავთ ყველას“, – განაცხადა დეპუტატმა.
გადაცემის წამყვანმა ევგენი პოპოვმა დეპუტატს მიუთითა, რომ „ასე არ შეიძლება“ და ხაზგასმით აღნიშნა, რომ ჟურნალისტი პროპაგანდისტია, „მტერია“, მაგრამ ასე არ შეიძლება.
„არ მაინტერესებს. მე იქ წავალ და თუ მას იქ დავინახავ… კი, ვემუქრები, მერე რა? ისინი არ გვემუქრებიან – იქ ჰაუბიცები ჩააყენეს?!“ – განაცხადა აღშფოთებულმა დეპუტატმა. – „ამ ნაბიჭვრებს იქ შეჰყავთ ჰაუბიცები, რომლებიც ჩემს თანამებრძოლებს კლავენ!“
