ნეტგაზეთი • RU
tvitmfrinavi

რუსეთი ცარიელ აეროდრომებს ბომბავდა – როგორ გადამალა უკრაინამ თავისი თვითმფრინავები

უკრაინაში რუსეთის შეჭრის პირველ დღეებში რუსები თავს ესხმოდნენ უკრაინის ცარიელ აეროდრომებს, რადგან უკრაინამ თავისი სამხედრო თვითმფრინავების გადამალვა მოახერხა.

რუსეთის მხრიდან ფართომასშტაბიანი შეჭრის დაწყების დროს უკრაინის გენშტაბმა გააანალიზა დასავლური დაზვერვის ყველა მონაცემი და მიიღო ზომები ჩვენი თვითმფრინავების გადასარჩენად. შედეგად, ომის დაწყების პირველ დღეებში ოკუპანტებმა დაბომბეს ცარიელი აეროდრომები – ამის შესახებ უკრაინული გამოცემა UNIAN-ი სამხედრო ექსპერტზე დაყრდნობით ავრცელებს ინფორმაციას.

„24 თებერვლის ღამეს, როცა უკრაინას მასიურად ურტყამდნენ რაკეტებით, ჩვენი ყველა აეროდრომი ცარიელი იყო, ჩვენი ავიაცია იქ არ იყო. სწორედ ამიტომ ჩვენი ავიაცია სრულად გადარჩა და შემდეგ ჩაერთო რუსეთის ფედერაციის წინააღმდეგ ბრძოლაში. სხვათა შორის, ომის პირველ კვირებში რუსეთის მხრიდან დაშვებულმა სიტუაციურმა შეცდომებმა თუ მოწინააღმდეგის შეფასებამ დიდი დახმარება გაგვიწია“, – აღნიშნავს სამხედრო ექსპერტი ოლეგ ჟდანოვი.

არადა, ომის პირველ დღეებში რუსეთის ფედერაცია თავის პროპაგანდისტულ მედიაში  აცხადებდა, რომ მან უკრაინის საჰაერო ძალები სრულად გაანადგურა.

„ასე, რომ მათ (რუსულმა ჯარს – UNIAN) პრაქტიკულად არაფერი გაუნადგურებია. დიახ, მათ დააზიანეს ინფრასტრუქტურა, ზოგიერთი აეროდრომი მწყობრიდან გამოიყვანეს, მაგრამ საჰაერო ძალები სრულად გადარჩა, რადგან გენერალურმა შტაბმა მიიღო დროული ზომები ჩვენი თვითმფრინავის გადასარჩენად და ამან იმუშავა“, – განაცხადა ექსპერტმა.

უკრაინის საჰაერო ძალები დღემდე აქტიურად იბრძვიან ოკუპაციის წინააღმდეგ.

ნეტგაზეთის მასალების სხვა გამოცემებში გადაბეჭდვის წესი
ავტორი
ეთერ თურაძე არის გაზეთ "ბათუმელების" მთავარი რედაქტორი 2001 წლიდან