უკრაინაში სრულმასშტაბიანი შეჭრის შემდეგ, სულ მცირე 10 რუსი გენერალია ლიკვიდირებული. გარდა ამისა, ოკუპანტები იძულებულები გახდნენ მინიმუმ 6 სამხედრო მეთაური გამოეცვალათ. ამის შესახებ ინფორმაცია დღეს, 7 აგვისტოს, ბრიტანეთის დაზვერვამ გაავრცელა.
დიდი ბრიტანეთის დაზვერვის შეფასებით, რუსეთის შეიარაღებული ძალების მიერ ცუდად შესრულებული ოპერაცია ძვირი დაუჯდა რუსეთის სამხედრო ხელმძღვანელობას.
კერძოდ, რუსეთის აღმოსავლეთ და დასავლეთ სამხედრო ოლქებში, სავარაუდოდ, დაკარგეს სარდლობა. გენერალ-პოლკოვნიკი ალექსანდრე ჩაიკა მაისში გაათავისუფლეს. ის აღმოსავლეთ ოლქს მეთაურობდა.
კიდევ ერთი რუსი გენერალი, ალექსანდრე ჟურავლევი, რომელიც დასავლეთის სამხედრო ოლქს 2018 წლიდან მეთაურობდა, 31 ივლისს, რუსეთის საზღვაო ძალების დღეს, არ იმყოფებოდა სანქტ-პეტერბურგში. დიდი ალბათობით ის გენერალ-ლეიტენანტ ვლადიმერ კოჩეტკოვით ჩაანაცვლეს.
გარდა ამისა, გენერალმა სერგეი სუროვიკინმა სამხრეთის ჯგუფის მეთაურობა გადაიბარა გენერალ გენადი ჟიდკოსგან.
გათავისუფლებულებს შორისაა ალექსანდრ დვორნიკოვი, რომელიც უკრაინის ოპერაციის საერთო მეთაური იყო.
ბრიტანული დაზვერვა დასძენს, რომ ამ სიას ემატება უკრაინაში ბრძოლის ველზე დაღუპული მინიმუმ 10 რუსი გენერალი, რაც უკრაინასთან ომში რუსეთს ტაქტიკურ და ოპერატიულ პრობლემებს უქმნის.
უკრაინის ინფორმაციით, დღეის მდგომარეობით, დაღუპულია 42 ათასზე მეტი რუსი ჯარისკაცი.